ထိုင်းနိုင်ငံ၊ ဘန်ကောက်မြို့၊ ယန်နာဝါရပ်ကွက်ထဲမှာ အောက်တိုဘာ ၂၆ ရက် မနက်စောစောက တရားမဝင်ဖွင့်လှစ်ထားတဲ့ KTV ခြံဝိုင်းတခုကို ထိုင်းရဲတပ်ဖွဲ့က ဝင်ရောက်စီးနင်းခဲ့ပြီး တရုတ်နိုင်ငံသား ၂၀၀ ကျော်ကို မူးယစ်ဆေးဝါး အမျိုးမျိုးနဲ့အတူ ဖမ်းဆီးရမိခဲ့တယ်လို့ ထိုင်းရဲတပ်ဖွဲ့ သတင်းမှာ ဖော်ပြပါတယ်။

ထိုင်းနိုင်ငံ မူးယစ်ဆေးဝါးစစ်ဆင်ရေး စီမံချက်အရ မူးယစ်ဆေးနဲ့ပတ်သက်တဲ့ နေရာတွေကို စုံစမ်းနှိမ်နင်းနေရာမှာ ယန်နာဝါရပ်ကွက် ကျရွန်းရတ်ဆဒွန်းလမ်း အမှတ် ၆၀-၆၁/၁ ခြံဝင်းထဲမှာ ကာရာအိုကေရုံတွေ ဖွင့်လှစ်ထားပြီး မူးယစ်ဆေးတွေပါ ရောင်းချကြောင်း စုံစမ်းထောက်လှမ်း သိရှိရတဲ့အတွက် ဒီကနေ့မနက် ၁ နာရီလောက်က ရဲတပ်ဖွဲ့ဝင်အင်အား ၁၀၀ ကျော်နဲ့ သွားရောက်စီးနင်းဖမ်းဆီးခဲ့တယ်လို့ နခွန်းဘန်းနယ်မြေရဲတပ်ဖွဲ့က ပြောပါတယ်။

အဆိုပါဇုန်ထဲမှာ ကျင်းလိန်၊ LEELA, WIP, CAR WASH စတဲ့ အဆောက်အဦတွေရှိပြီး တာဝန်ရှိသူတွေ ဝင်ရောက်သွားတဲ့အခါ အထဲကလူတွေ ရုတ်ရုတ်သဲသဲ ထွက်ပြေး ပုန်းရှောင်ကြကြောင်း၊ တချို့က မီးဖိုခန်း၊ တချို့က အိမ်သာ ရေချိုးခန်း၊ စတိုခန်း စသဖြင့် ဝင်ပုန်းကြလို့ အားလုံးကိုခေါ်ယူပြီး မူးယစ်ဆေးသုံးစွဲမှု စစ်ဆေးခဲ့တယ်လို့ ဆိုပါတယ်။

ကနဦးစစ်ဆေးချက်အရ အဲဒီမှာ လာရောက်ပျော်ပါးတဲ့ ဧည့်သည်တရုတ်နိုင်ငံသား ၂၃၇ ဦး (ကျား ၁၁၁ ဦး၊ မ ၁၂၆ ဦး)နဲ့ ထိုင်းနဲ့ ကမ္ဘောဒီးယားပါ ဝန်ထမ်း/အလုပ်သမား ၂၉ ဦးကို စစ်ဆေးဖို့ ထိန်းသိမ်းခဲ့ကြောင်း၊ စားပွဲပေါ်မှာလည်း ခေတာမင်၊ Happy Water၊ ဖိုက်ဖိုက် အစရှိတဲ့ မူးယစ်ရီဝေစေတဲ့ ဆေးတွေပါအထုပ် ၃၀၀ ကျော် သိမ်းဆည်းရမိခဲ့တယ်လို့ ရဲတပ်ဖွဲ့က ပြောပါတယ်။ ဝင်းထဲမှာရပ်ထားတဲ့ ကားအစီး ၃၀ ကိုလည်း စစ်ဆေးသွားမယ်လို့ ဆိုပါတယ်။

ဒါ့အပြင် လောင်းကစားဝိုင်းလည်း ဖွင့်လှစ်ထားကြောင်း၊ အဆိုပါ KTV ဟာ တရားဝင် ခွင့်ပြုချက်လည်း မရှိတဲ့အတွက် ဥပဒေအရ ဆက်လက်အရေးယူသွားမယ်လို့ ထိုင်းရဲတပ်ဖွဲ့ တာဝန်ရှိသူ ရဲမှူးချုပ် ဆဲန်ဆဝမ်က ပြောပါတယ်။

Ref- PoliceTV