ဆိုမာလီနိုင်ငံ မိုဂါဒစ်ရှူးမြို့တော်မှာ အောက်တိုဘာ ၂၉ ရက် ဗုံးကွဲမှုကြောင့် လူအများအပြား သေဆုံးခဲ့တယ်လို့ ရဲတပ်ဖွဲ့နဲ့ မျက်မြင်သက်သေတွေက ပြောပါတယ်။ 

၃၀ ထက် မနည်း သေဆုံးခဲ့ပြီး နောက်ထပ် အလောင်းတွေ ထပ်ရောက်လာနိုင်တယ်လို့ ဆေးရုံလုပ်သား တယောက်ကို ကိုးကားပြီး ဝါရှင်တန်ပို့စ်သတင်းဌာနက ဖော်ပြပါတယ်။

ဗုံးပေါက်ကွဲမှုတွေထဲက တခုဟာ ဇုန်လမ်းဆုံက ပညာရေးဝန်ကြီးဌာနကို ပစ်မှတ်ထား တိုက်ခိုက်ခဲ့တာဖြစ်ပြီး အစိုးရရုံးတွေ၊ ဟိုတယ်တွေနဲ့ စားသောက်ဆိုင်တွေရှိရာ K-5 လမ်းဆုံနားမှာ တခြား ပေါက်ကွဲမှု နှစ်ခု ရှိခဲ့တယ်လို့ ရဲတပ်ဖွဲ့က ပြောပါတယ်။

ဗုံးတွေ တင်လာတဲ့ ယာဉ်တစ်စီးက ပညာရေး ဝန်ကြီးဌာနထဲကို ဝင်ဖို့ ကြိုးပမ်းခဲ့ပြီး မကြာမီ သေနတ်သံတွေ ကြားခဲ့ရတယ်လို့ ရဲတပ်ဖွဲ့က ပြောပါတယ်။

တိုက်ခိုက်မှုအတွက် ဘယ်အဖွဲ့ ဒါမှမဟုတ် ဘယ်သူကမှ တာဝန်ရှိကြောင်း ထုတ်မပြောကြသေးပါဘူး။ 

အထူးသဖြင့် မြို့တော်ကို ပစ်မှတ်ထားလေ့ရှိတဲ့ အယ်လ်ကိုင်းဒါးနဲ့ ဆက်နွှယ်နေတဲ့ အယ်လ်ရှာဘတ် အုပ်စုရဲ့ ပြင်းထန်တဲ့ အစွန်းရောက်မှုတွေကို တိုက်ဖျက်ရာမှာ တိုးချဲ့ကြိုးပမ်းရေး ဆွေးနွေးဖို့ သမ္မတ၊ ဝန်ကြီးချုပ်နဲ့ တခြား အကြီးတန်းအရာရှိတွေ တွေ့ဆုံတဲ့နေ့မှာ မိုဂါဒစ်ရှူး မြို့တော်မှာ တိုက်ခိုက်ခံခဲ့ရတာပါ။