တရုတ်ဝန်ကြီးချုပ်ရဲ့ဖိတ်ကြားချက်အရ ပါကစ္စတန် ဝန်ကြီးချုပ် ရှာဘတ်စ် ရှာရစ်ဖ်ဟာ နိုဝင်ဘာ ၁ ရက်က စပြီး တရုတ်နိုင်ငံဆီ လာရောက်လည်ပတ်မှာပါ။

နှစ်နိုင်ငံအကြား ပိုနီးကပ်တဲ့ ပူးပေါင်းဆောင်ရွက်မှုနဲ့ ဖလှယ်မှုတွေ ဖြစ်လာမယ်လို့ မျှော်လင့်ထားပါတယ်။

သူ့ ခရီးစဉ်မတိုင်မီ ရှရစ်ဖ်က တရုတ်မီဒီယာတွေကို ဖိတ်ခေါ်တာဟာ နှစ်နိုင်ငံကြား ချစ်ကြည်ရင်းနှီးမှု နက်ရှိုင်းတာကို ပြသတာလို့ အောက်တိုဘာ ၂၈ ရက်က ပြောခဲ့ပါတယ်။ 

တရုတ်သမ္မတ ရှီကျင့်ဖျင်၊ ဝန်ကြီးချုပ် လီ၊ အကြီးတန်း တရုတ်ခေါင်းဆောင်တွေနဲ့ ဆွေးနွေးမှုတွေအတွင်း ရှေ့ဆက် ကဏ္ဍစုံနဲ့ နယ်ပယ်အသီးသီးမှာ ပူးပေါင်းဆောင်ရွက်မှုတွေ တိုးမြှင့်ပြီး ပိုမိုတိုးချဲ့သွားဖို့ မျှော်လင့်ပါတယ်လို့ ရှရစ်ဖ်က ပြောပါတယ်။ ဆယ်စုနှစ်များစွာအတွင်း အဆိုးရွားဆုံး ရေလွှမ်းမိုးမှုကို ရင်ဆိုင်ဖို့ ပါကစ္စတန်ဆီကို သဘာဝဘေး အန္တရာယ် ကယ်ဆယ်ရေးပစ္စည်းတွေ အများအပြား လှူဒါန်းခဲ့တဲ့ တရုတ်အစိုးရ၊ လူတဦးချင်းစီနဲ့ ကုမ္ပဏီတွေကိုလည်း ပါကစ္စတန် ၀န်ကြီးချုပ်က ကျေးဇူးတင်တယ်လို့ ပြောပါတယ်။ 

တရုတ်နိုင်ငံရဲ့ ဖွံ့ဖြိုးတိုးတက်မှုဟာ ဆင်းရဲနွမ်းပါးတဲ့ နိုင်ငံအဖြစ်ကနေ ချမ်းသာတဲ့ နိုင်ငံတခု အဖြစ် မကြုံစဖူး အံ့ဖွယ်ပြောင်းလဲခဲ့လို့ ပါကစ္စတန်ဟာ တရုတ်နိုင်ငံရဲ့ အတွေ့အကြုံကနေ သင်ယူဖို့ မျှော်လင့်တယ်လို့လည်း ရှရစ်ဖ်က ပြောခဲ့ပါတယ်။

တရုတ်- ပါကစ္စတန် စီးပွားရေးစင်္ကြန် (CPEC) ကြောင့် ပါကစ္စတန်ဟာ အခြေခံအဆောက်အဦတွေ အမြန်ဖွံ့ဖြိုးတိုးတက်လာတာကို မြင်တွေ့ခဲ့ရတယ်၊ တရုတ်နိုင်ငံရဲ့ ခါးပတ်တကွင်း လမ်းတစင်း စီမံကိန်းဟာ  နိုင်ငံတကာ အသိုက်အဝန်းအတွက် အများကြီး အထောက်အကူဖြစ်တယ်လို့ ပါကစ္စတန် ဝန်ကြီးချုပ်က အလေးပေးပြောကြားခဲ့ပါတယ်။