ဒုံးကျည်ပစ်လွှတ်မှုအပေါ် ကုလကြေညာချက် မတရားဟု မြောက်ကိုရီးယား ရှုတ်ချ
မြောက်ကိုရီးယားရဲ့ ဒုံးကျည်ပစ်လွှတ်မှုနဲ့ ပတ်သက်ပြီး ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်ရဲ့ လတ်တလော ကြေညာချက်ဟာ မတရားဘူးလို့ မြောက်ကိုရီးယားက နိုဝင်ဘာ ၈ ရက်မှာ ပြစ်တင်ရှုတ်ချလိုက်ပါတယ်။
သူ့ရဲ့ ဒုံးကျည်ပစ်လွှတ်မှုဟာ အမေရိကန်ရဲ့ စစ်ရေးရန်စမှုကနေ ကိုယ့်ကိုယ်ကိုယ် ကာကွယ်ဖို့ တန်ပြန် အရေးယူဆောင်ရွက်ချက်သာ ဖြစ်တယ်လို့လည်း မြောက်ကိုရီးယားအစိုးရ မီဒီယာက ကြေညာပါတယ်။
မြောက်ကိုရီးယားရဲ့ လတ်တလော ဒုံးကျည်ပစ်လွှတ်စမ်းသပ်ချက်တွေကို ဂူတားရက်စ်က နိုဝင်ဘာ ၄ ရက်မှာ ပြစ်တင်ရှုတ်ချခဲ့ပြီး နောက်ထပ် ဘယ်လို ကျူးကျော်ရန်စတဲ့ လုပ်ရပ်ကိုမဆို ချက်ချင်း ရပ်တန်းကရပ်ဖို့ မြောက်ကိုရီးယားကို တိုက်တွန်းခဲ့ပါတယ်။
ကိုရီးယားကျွန်းဆွယ်မှာ အပြင်းအထန် ဖြစ်လာနေတဲ့ အခြေအနေအတွက် ကုလ အတွင်းရေးမှူးချုပ်ရဲ့ တရားမျှတမှုမရှိတဲ့ အပြုအမူကို တစိတ်တပိုင်း အပြစ်တင်ရမယ်လို့ ထင်ကြောင်း မြောက်ကိုရီးယား နိုင်ငံခြားရေးဝန်ကြီးဌာန နိုင်ငံတကာ အဖွဲ့အစည်းများဆိုင်ရာ ဒုဝန်ကြီးက ကြေညာချက်ထုတ်ပြန် ပြောဆိုခဲ့ပြီး ဒီထုတ်ပြန်ချက်ကို အစိုးရမီဒီယာ KCNA က ထုတ်လွှင့်ခဲ့ပါတယ်။
အရင်အပတ်က မြောက်ကိုရီးယားဟာ မအောင်မြင်တဲ့ တိုက်ချင်းပစ် ပဲ့ထိန်းဒုံးကျည် (ICBM) ဖြစ်နိုင်တဲ့ ဒုံးကျည် အပါအဝင် ဒုံးကျည်အစင်းရေ အတော်များများကို စမ်းသပ်ပစ်လွှတ်ခဲ့သလို ရာချီတဲ့ အမြောက်ဆန်တွေကိုလည်း ပင်လယ်ထဲ ပစ်ခတ်ခဲ့ပါတယ်။
ခြောက်ရက်ကြာတဲ့ တောင်ကိုရီးယားနဲ့ အမေရိကန် ပူးတွဲလေကြောင်း စစ်ရေးလေ့ကျင့်မှုကတော့ နိုဝင်ဘာ ၅ ရက်မှာ အဆုံးသတ်ခဲ့ပါတယ်။
