တောင်ကိုရီးယား သင်္ဘောတစင်းက မြောက်ကိုရီးယား တာတိုပစ် ပဲ့ထိန်းဒုံးကျည် (SRBM) ရဲ့ တစိတ်တပိုင်းလို့ ယူဆရတဲ့ အပျက်အစီးတွေကို ရှာတွေ့ခဲ့တယ်လို့ တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) က နိုဝင်ဘာ ၇ ရက်မှာ ပြောလိုက်ပါတယ်။

မြောက်ကိုရီးယားရဲ့ ပဲ့ထိန်းဒုံးကျည်တစင်း တောင်ကိုရီးယား ရေပိုင်နက်နားမှာ ပထမဆုံးအကြိမ် ကျရောက်ခဲ့တာပါ။

တောင်ကိုရီးယား ရေတပ်ကယ်ဆယ်ရေးသင်္ဘောက ဒုံးကျည်အစိတ်အပိုင်းတွေကို ဆယ်ယူဖို့ ရေအောက်စူးစမ်းရေးယာဉ်ကို သုံးခဲ့တယ်လို့လည်း JCS အရာရှိက ပြောပါတယ်။

တောင်ကိုရီးယားနဲ့ အမေရိကန်တို့ရဲ့ ခြောက်ရက်ကြာ လေကြောင်း စစ်ရေးလေ့ကျင့်မှုဟာ စနေနေ့မှာ ပြီးဆုံးခဲ့ပြီး ဒီ ပူးတွဲစစ်ရေးလေ့ကျင့်မှုဟာ ပွင့်လင်းတဲ့ ရန်စမှုနဲ့ အန္တရာယ်ရှိတဲ့ စစ်ရေးလေ့ကျင့်မှုတရပ်လို့ မြောက်ကိုရီးယားစစ်တပ်က အစောပိုင်းမှာ ပြောခဲ့ပါတယ်။

ပြီးခဲ့တဲ့သီတင်းပတ်က မြောက်ကိုရီးယားဟာ တိုက်ချင်းပစ်ဒုံးကျည် (ICBM) အပါအဝင် ဒုံးကျည်အများအပြားကို စမ်းသပ်ပစ်လွှတ်ခဲ့ပါတယ်။