နိုဝင်ဘာ ၁၀ ရက် မနက်ပိုင်းက အမည်မသိ လက်နက်ကိုင် ၃ ဦးရဲ့ ဖမ်းဆီးခေါ်ဆောင်ခံခဲ့ရတဲ့ ခလက-၄၈ တပ်က ဒုတပ်ရင်းမှူးရဲ့ ဇနီးဖြစ်သူ မဟန်နွေဦးကို ညနေပိုင်းမှာ ပြန်ကယ်တင်နိုင်ခဲ့တယ်လို့ စစ်ကောင်စီက သတင်းထုတ်ပြန်ပါတယ်။

မကွေးတိုင်း၊ ပခုက္ကူမြို့၊ ဝိပဿနာလမ်းမှာရှိတဲ့‌ အောင်ဆင်မင်း လက်ဖက်အကြော်စုံ လုပ်ငန်းမှာ ဖမ်းဆီး‌ခေါ်ဆောင်ခံခဲ့ရတဲ့ ဒုတပ်ရင်းမှူးရဲ့ ဇနီးဖြစ်သူကို မြိုင်မြို့နယ်ထဲက ကျောက်ဆောက်တမံ ရှင်းလင်းဆောင်မှာ ပြန်တွေ့ခဲ့တာဖြစ်ပြီး ဖမ်းခေါ်သွားတဲ့ အဖွဲ့တွေနဲ့လည်း ထိတွေ့မှုတွေ ဖြစ်ပွားခဲ့တယ်လို့ ဆိုပါတယ်။

ဖမ်းဆီးခံရသူဟာ ခလရ-၄၈ က ဒုတပ်ရင်းမှူး အဆင့်ရှိသူရဲ့ ဇနီးဖြစ်တာကြောင့် စစ်ကောင်စီဘက်က ရဟတ်ယာဉ်သုံးပြီး ကွန်မန်ဒိုတပ်ဖွဲတွေနဲ့ ရှာဖွေခဲ့ကာ နာရီပိုင်းအကြာမှာပဲ ပြန်လည်ကယ်တင်ခဲ့တာလို့ ရေးထားပါတယ်။

အဆိုပါအမျိုးသမီးကို ဖမ်းဆီးခေါ်ဆောင်သွားတုန်းက ဆွဲကြိုး၊ နားကပ်နဲ့ လက်ကိုင်ဖုန်း ၈ လုံးကိုပါ လက်နက်ကိုင်အဖွဲ့က ယူဆောင်သွားတယ်လို့ စစ်ကောင်စီဘက်က သတင်းလွှင့်ပေမဲ့ လာရောက်ဖမ်းဆီးသွားတဲ့ CCTV မှတ်တမ်းမှာတော့ အဲဒီလို ယူဆောင်သွားတာကို မတွေ့ရပါဘူး။

အောင်ဆင်မင်း လက်ဖက်အကြော်စုံ လုပ်ငန်းကတော့ လုံခြုံရေးအခြေအနေအရ ဆိုင်ပိတ်ထားတယ်လို့လည်း သူတို့ရဲ့ လူမှုကွန်ရက် စာမျက်နှာမှာ ကြေညာထားပါတယ်။

အခုဖြစ်စဉ်နဲ့ပတ်သက်လို့ ဒေသတွင်း လက်နက်ကိုင်တပ်ဖွဲ့တွေက သတင်းထုတ်ပြန်တာမျိုး မတွေ့ရသေးပါဘူး။