စစ်ကိုင်းတိုင်း၊ ဝက်လက်မြို့နယ်၊ ထန်းကြီးကျေးရွာက လူနေအိမ် ၃၈၀ နဲ့ ဒေသခံ ၄ ယောက်ကို စစ်ကောင်စီတပ်က မီးရှို့သတ်ဖြတ်ထားခဲ့တယ်လို့ ဒေသခံတွေဆီက သိရပါတယ်။

နိုဝင်ဘာ ၁၃ ရက် မနက်ပိုင်းက စစ်ကောင်စီတပ် မီးရှို့ခဲ့တဲ့ မီးလောင်အိမ်တွေကို ဒေသခံ ပြည်သူ့ကာကွယ်ရေးတပ်ဖွဲ့ဝင်တွေက စစ်ကောင်စီတပ် ရွာထဲကနေ ထွက်သွားပြီးမှ မီးငြှိမ်းသတ်ပေးခဲ့ရတယ်လို့ ရွှေဘိုခရိုင်တပ်ရင်း-၁၈ တာဝန်ရှိသူ ဗိုလ်စွန်ရဲက ပြောပါတယ်။

“စစ်ကြောင်းထိုးလာပြီး မီးရှို့တာ။ အခု မနက်ခင်း ၇ နာရီလောက်က စရှို့တာပဲ။ ဘာတိုက်ပွဲမှမရှိဘူး။ စစ်ကောင်စီက ဒီ နိုဝင်ဘာလအတွင်း ကျနော်တို့ PDF အဖွဲ့တွေနဲ့ ထိပ်တိုက် တိုက်ပွဲမဖော်ဆောင်ဘူး။ ပြည်သူကို ဒုက္ခရောက်၊ စိတ်ဓာတ်ကျအောင် တမင်လုပ်နေတာ။ ဒီနေ့ နိုဝင်ဘာ ၁၄ ရက်မှာလည်း ကျောင်းဖြူကျေးရွာကို မီးထပ်ရှို့နေတယ်။ မနေ့က သူတို့ ထန်းကြီးရွာ မီးရှို့ခဲ့တာ အိမ် ၃၈၀ မီးလောင်တယ်။ အရပ်သား ၄ ဦး မီးရှို့သတ်ထားခဲ့တဲ့ အလောင်းလည်း တွေ့ရတယ်။ အဲ့အရပ်သားတွေက ထန်းကြီးရွာသားတွေနဲ့ ပေါက်ကန်ရွာသားတွေလို့ သိထားရတယ်။”

စစ်ကောင်စီတပ်က ထန်းကြီးရွာကနေ ကျောင်းဖြူကျေးရွာဘက် ထွက်သွားပြီး စစ်ဘေးရှောင်နေသူ ၄ ယောက်ထက်မနည်းကို ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။

“ဒီနေ့ ကျောင်းဖြူရွာကို ထပ်မံမီးရှို့တာတွေ စခတွေလုပ်တယ်ဗျ။ အိမ် ၆ လုံးကျော်ကို မီးလောင်သွားတယ်။ သူတို့လာလို့ ထွက်ပြေးပြီး လမ်းဘေးတွေမှာ ရပ်ထားတဲ့ ဆိုင်ကယ်တွေလည်း မီးရှို့သွားတယ်။ လတ်တလောကတော့ အုပ်ဖိုရွာဘက် ထွက်သွားတယ်။ အဲဒါကို ကျနော်တို့အဖွဲ့က လက်နက်ကြီး ၄ လုံးနဲ့ ပစ်ခတ်တာတွေလည်း လုပ်ခဲ့သေးတယ်” လို့ ဝက်လက်ပြည်သူ့ကာကွယ်ရေးတပ်မှ ဗိုလ်ကျားကြီးက ပြောပါတယ်။

ဝက်လက်မြို့နယ်အတွင်း မြေပြင်စစ်ကြောင်းက ပစ်ခတ်တာရော၊ ဧရာဝတီမြစ်အတွင်းက စုန်ဆင်းလာတဲ့ စစ်သင်္ဘောက ပစ်ခတ်တာရော စစ်ကောင်စီက လုပ်ဆောင်နေတာကြောင့် ဝက်လက်ဒေသခံ ထောင်နဲ့ချီ စစ်ဘေးရှောင်နေကြရတယ်လို့လည်း ဒေသခံတွေဆီကနေ သိရပါတယ်။