ရုရှားက ယူကရိန်းကို ဒုံးကျည်အလုံး ၁၀၀ ခန့် ပစ်ခတ်
ရုရှားက ယူကရိန်းနိုင်ငံထဲကို ဒုံးကျည်အလုံး ၁၀၀ လောက်နဲ့ ပစ်ခတ်ခဲ့ပြီးတဲ့နောက် နိုဝင်ဘာ ၁၅ ရက်က ယူကရိန်းမြို့တော် ကိယက်ဗ်မှာ နောက်ထပ် မီးပျက်သွားပါတယ်။
ကိယက်ဗ်မြို့တော်မှာ နေထိုင်သူတွေဟာ မော်တော်ကားတွေနဲ့ မီးပွိုင့်တွေက အလင်းရောင်တွေနဲ့သာ မြို့လယ်ခေါင်က လမ်းမှောင်မှောင်တွေကို ဖြတ်သန်း သွားလာနေရပါတယ်။
နိုင်ငံအနောက်ပိုင်းက ကိဗ်၊ လစ်ဗီနဲ့ ရစ်ဗ်နာမြို့တွေ၊ အရှေ့မြောက်ဘက်က ခါခိဗ်၊ အလယ်ပိုင်းက ခရစ်ဗီရီနဲ့ ပိုလ်တာဗာ၊ တောင်ဘက်က ဩဒက်ဆာနဲ့ မြောက်ဘက်က ဇစ်တိုမြာ ဒေသတွေ အပါအဝင် မြို့တွေနဲ့ ဒေသတွေရဲ့ အစိတ်အပိုင်းတွေမှာ ဒုံးကျည်အမြောက်အမြား ပစ်ခတ်ခံခဲ့ရပါတယ်။
ကိဗ်မြို့တော်ဝန် ဗီတာလီ ကလစ်ချ်ကိုက မြို့တော်ရဲ့ ထက်ဝက်လောက် လျှပ်စစ်မီး ပြတ်တောက်နေပြီး မြို့တော်ရဲ့ အလယ်ပိုင်းဧရိယာမှာ လူနေအဆောက်အအုံ ၂ လုံး ဒုံးကျည်ထိမှန်ခဲ့တယ်လို့ ပြောပါတယ်။
ကမ္ဘာ့စီးပွားရေးအင်အားကြီးနိုင်ငံ ၂၀ အဖွဲ့ G20 ထိပ်သီးအစည်းအဝေးမှာ အနောက်နိုင်ငံတွေက ရုရှားရဲ့ကျူးကျော်မှုကို ရှုတ်ချတဲ့ ကြေညာချက်ကို ယူကရိန်းသမ္မတ ဗိုလိုဒီမာ ဇလန်းစကီးက ဗွီဒီယိုမိန့်ခွန်းကနေ ပြောခဲ့ပါတယ်။
အဲဒီနောက် တိုက်ခိုက်မှုတွေ စတင်ခဲ့တဲ့ ဧရိယာအများအပြားမှာ အသေအပျောက်ကို ချက်ချင်း ထုတ်ဖော်ပြောဆိုခြင်း မရှိပေမဲ့ လျှပ်စစ်မီးတွေ ပြတ်တောက်သွားခဲ့ရပါတယ်။
