ဂျပန်အသင်းနဲ့ ကမ္ဘာ့ဖလားအုပ်စုအဆင့်ပွဲစဉ်မှာ ဂျာမနီအသင်းသားတွေဟာ ပါးစပ်ကို လက်နဲ့အုပ် ပြီး ဆန္ဒထုတ်ဖော်ခဲ့ပါတယ်။

ပွဲမစတင်ခင် အသင်းလိုက်ဓာတ်ပုံရိုက်ကူးရာမှာ ဂျာမနီအသင်းရဲ့ ပွဲထွက်ကစားသမား ၁၁ ဦးက သူတို့ရဲ့ပါးစပ်တွေကို လက်တွေနဲ့အုပ်ပြီး တညီတညွတ်တည်း ဆန္ဒထုတ်ဖော်ခဲ့တာပါ။

ဒီလိုဆန္ဒပြခဲ့တာက One Love စာသားပါ သက်တံရောင်လက်ပတ်ကို ဝတ်ဆင်ခွင့်မရ လို့ဖြစ်ပြီး ဂျာမနီအသင်းက ဖီဖာဆီ ဖြေရှင်းချက်တောင်းထားပါတယ်။

One Love စာသားပါ သက်တံရောင်လက်ပတ်ကို ဥရောပအသင်း ၉ သင်းက အသင်းခေါင်းဆောင်တွေက ဝတ်ဆင်ဖို့ စီစဉ်ခဲ့ကြပေမဲ့ ဖီဖာဘက်က ပိတ်ပင်ခဲ့ပြီး အဝါကတ်ပြသမယ်လို့ ခြိမ်းခြောက်ခဲ့တာပါ။

ဒိုင်လူကြီးတစ်ဦးဟာ ဂျာမနီအသင်းခေါင်းဆောင် ဂိုးသမားနူအာရဲ့ လက်မောင်းကိုလည်း ပွဲမစခင်မှာ စစ်ဆေးခဲ့ပါတယ်။

အဆိုပါလက်ပတ်ဟာ လိင်တူချစ်သူများအခွင့်အရေးတွေကို ပိတ်ပင်ထားပြီး ကြီးလေးတဲ့ ဥပဒေတွေ ပြဋ္ဌာန်းထားတဲ့ အိမ်ရှင်ကာတာနိုင်ငံကို ကန့်ကွက်ရှုတ်ချတဲ့အနေနဲ့ ဝတ်ဆင်ဖို့ ဆန္ဒရှိခဲ့ ကြတာပါ။

ဂျပန်နဲ့ပွဲစဉ်ကို လာရောက်ကြည့်ရှုခဲ့တဲ့ ဂျာမနီပြည်ထဲရေးဝန်ကြီး မစ္စနမ်စီကတော့ ဖီဖာဥက္ကဋ္ဌဘေးမှာ One Love စာသားပါ သက်တံရောင်လက်ပတ်ကို ဘယ်ဘက်လက်မောင်းမှာ ချည်နှောင်ပြီး အားပေးခဲ့တာ တွေ့ရပါတယ်။