အမေရိကန်နဲ့ အုပ်စုဒုတိယပွဲစဉ်ဟာ အီရန်ကိုဂိုးပြတ်အနိုင်ရခဲ့တဲ့ပွဲစဉ်လို ဖြစ်လာဖို့မရှိဘဲ ခက်ခက်ခဲခဲ ကစားရနိုင်ကြောင်း အင်္ဂလန်နည်းပြဆောက်ဂိတ်က သုံးသပ်ပြောပါတယ်။

အမေရိကန်အသင်းမှာ ဥရောပထိပ်တန်းလိဂ်တွေက အတွေ့အကြုံရှိကစားသမားတွေပါဝင်ပြီး ဘောလုံးလုယူပုံ ကောင်းမွန်ကြောင်း၊ အီရန်နဲ့ ပွဲစဉ်တုန်းကလို အလွယ်တကူ ဂိုးပြတ်အနိုင်ရဖို့ မဖြစ်နိုင်ကြောင်း နည်းပြဆောက်ဂိတ်ကပြောပါတယ်။

အမေရိကန်အသင်းဟာ ပထမပွဲစဉ်တုန်းက ဝေးလ်အသင်းနဲ့ တစ်ဂိုးစီသရေကျခဲ့တာပါ။ ဒီပွဲမှာ နှစ်သင်းစလုံးအတွက် အရေးပါတဲ့ပွဲစဉ်ဖြစ်ပြီး အင်္ဂလန်အသင်းက နိုင်ပွဲထပ်ယူနိုင်မယ်ဆိုရင် နောက် တစ်ဆင့်တက်ဖို့ သေချာစေမှာပါ။

အင်္ဂလန်အသင်းအနေနဲ့ အီရန်နဲ့ပွဲက ရလဒ်ပိုင်းကြောင်း စိတ်ဓာတ်တက်ကြွစွာနဲ့ ကစားနိုင်တာမှန်ပေမယ့် ပြိုင်ဘက်အသင်းကိုလည်းလေးစားရမှာဖြစ်ကြောင်း အမေရိကန် အသင်းမှာ ပရီးမီးယားလိဂ်မှာကစားနေတဲ့ အရည်အသွေးမြင့်ကစားသမားတွေရှိတာကိုလည်း သိရှိကြောင်း နည်းပြဆောက်ဂိတ်ကပြောသွားပါတယ်။