ဘရာဇီးနိုင်ငံတောင်ပိုင်းမှာ မိုးသည်းထန်စွာ ရွာသွန်းပြီး ရေကြီးရေလျှံမှု ဖြစ်ပွားခဲ့လို့ ဒီဇင်ဘာ ၁ ရက်နေ့မှာ အနည်းဆုံး လူနှစ်ဦး သေဆုံးပြီး တဦးပျောက်ဆုံးနေကြောင်း အာဏာပိုင်တွေက သတင်းထုတ်ပြန်ခဲ့ပါတယ်။

ထိခိုက်မှုများနေတဲ့ ဆန်တာ ကတာရီနာပြည်နယ်ရဲ့ အုပ်ချုပ်ရေးမှူး ကားလော့စ် မွိုက်ဆက်စ်ရဲ့ အဆိုအရ သေဆုံးမှုတခုဟာ လျှပ်စစ်ရှော့ခ်ကြောင့်ဖြစ်ပြီး ကျန်တယောက်က မြေပြိုမှုနဲ့ ဆက်စပ်နေပါတယ်။

မီးသတ်တပ်ဖွဲ့ဝင်တဦးလည်း ရေစီးအရမ်းသန်နေတဲ့ ရေစီးကြောင်းနဲ့အတူ မြစ်ထဲကို ပြုတ်ကျပြီး ပျောက်ဆုံးနေကြောင်း သတင်းပို့ထားပြီး ရှာဖွေရေးအဖွဲ့တွေကို နေရာဖြန့်ချထားကြောင်းလည်း သူကပြောပါတယ်။

မြို့အများအပြားမှာလည်း အရေးပေါ်အခြေအနေ ကြေညာထားတာကြောင့် ဆန်တာ ကတာရီနာ ပြည်နယ်အာဏာပိုင်တွေက လမ်းခရီးသွားတာကို ရှောင်ရှားကြဖို့ ပြည်သူတွေကို တောင်းဆိုထားပါတယ်။

ကယ်ဆယ်ရေးအဖွဲ့တွေဟာ ဒီဇင်ဘာ ၁ ရက်က မြေပြိုမှုအတွင်း နစ်မြုပ်သွားခဲ့တဲ့ အသက်ရှင်ကျန်ရစ်သူတွေကို ရှာဖွေဖို့ အနံ့ခံခွေးတကောင်နဲ့အတူ လုပ်ဆောင်နေပါတယ်။

ဘရာဇီးနိုင်ငံ တောင်ပိုင်းက ပါရာနာပြည်နယ်မှာ ရေကြီးမြေပြိုမှုကြောင့် လူဒါဇင်နဲ့ချီ ပျောက်ဆုံးခဲ့ပြီး စပါးနဲ့ သကြားတွေကို တင်ပို့ရတဲ့ အဓိကဆိပ်ကမ်းဆီ ဝင်ရောက်ခွင့်ကိုလည်း ဖြတ်တောက်ခဲ့ကြောင်း အာဏာပိုင်တွေက နိုဝင်ဘာ ၃၀ ရက်မှာ ပြောကြားခဲ့ပါတယ်။

ဂွါရာတူဘာမြို့ရှိ အဝေးပြေးလမ်းမှာ မြေပြိုမှုအတွင်း အနည်းဆုံး လူ ၃၀ ထက်မနည်းကို ကယ်ဆယ်နိုင်ခဲ့ကြောင်း ကယ်ဆယ်ရေးလုပ်ငန်းတွေကို လုပ်ဆောင်နေတဲ့ တာဝန်ရှိသူတွေက ပြောပါတယ်။

အာဏာပိုင်တွေရဲ့အဆိုအရ ဒီဇင်ဘာလမှာ မိုးရွာသွန်းမှုက ခန့်မှန်းထားတာထက် ပိုများပြားခဲ့ပြီး တချို့ဒေသတွေမှာ မိုးရေချိန် ၆ ဆအထိ ပိုများခဲ့ပါတယ်။