ရုရှားသမ္မတ ဗလာဒီမာပူတင်ဟာ ဒီဇင်ဘာ ၅ ရက်က သိမ်းပိုက်ထားတဲ့ ခရိုင်းမီးယား ကျွန်းဆွယ်နဲ့ ရုရှားနိုင်ငံတောင်ပိုင်းကို ဆက်သွယ်ထားတဲ့ ခရိုင်းမီးယားတံတားကို ဖြတ်ကျော် ရောက်ရှိလာပါတယ်။

ဒုတိယဝန်ကြီးချုပ် မာရတ် ခွတ်စနူလင်နဲ့အတူ လိုက်ပါလာတဲ့ ပူတင်ဟာ တိုက်ခိုက်မှု ဖြစ်ပွားတဲ့နေရာနဲ့ ပတ်သက်ပြီး မေးခွန်းတွေမေးနေပုံကို နိုင်ငံပိုင် ရုပ်မြင်သံကြားမှာ ပြသပါတယ်။

ပူတင်ဟာ လောင်ကျွမ်းပျက်စီးထားတဲ့ နေရာအပိုင်းတွေကို စစ်ဆေးဖို့ တံတားရဲ့ အစိတ်အပိုင်းတွေတလျှောက် လမ်းလျှောက်ခဲ့ပြီး ပြုပြင်ရေးတွေလုပ်နေတဲ့ ဆောက်လုပ်ရေး လုပ်သားတွေနဲ့ စကားပြောဆိုခဲ့ပါတယ်။

၂၀၁၈ ခုနှစ်က ပူတင်ကိုယ်တိုင် ဖွင့်လှစ်ခဲ့တဲ့ ၁၉ ကီလိုမီတာအရှည် ကားလမ်း၊ ရထားလမ်း ပါဝင်တဲ့ တံတားဟာ အောက်တိုဘာ ၈ ရက်က ဗုံးကြဲတိုက်ခိုက်ခံခဲ့ရပြီး ဒီတိုက်ခိုက်မှုကို ယူကရိန်းက လုပ်ဆောင်တာဖြစ်ကြောင်း ရုရှားက ပြောကြားခဲ့ပါတယ်။

ပူတင်ရဲ့ နှစ် ၇၀ ပြည့် မွေးနေ့အပြီး နောက်တရက်မှာ ဖြစ်ပွားခဲ့တဲ့ ဒီပေါက်ကွဲမှုအတွက် တာဝန်ရှိကြောင်း ယူကရိန်းက ဘယ်တုန်းကမှ ထုတ်ဖော်ပြောဆိုတာ မရှိခဲ့ပါဘူး။

ရုရှား ဖက်ဒရယ်လုံခြုံရေးဌာနကတော့ တိုက်ခိုက်မှုကို ယူကရိန်း စစ်ထောက်လှမ်းရေးက စီစဉ်တာဖြစ်တယ်လို့ ပြောပါတယ်။

ပေါက်ကွဲမှုကြောင့် ကားလမ်းတံတားရဲ့ အပိုင်းတပိုင်း ပျက်စီးခဲ့ပြီး ကာ့ချ် ရေလက်ကြားတလျှောက် အသွားအလာ ခနရပ်တန့်ခဲ့ရပါတယ်။

ဒီပေါက်ကွဲမှုကြောင့် အိမ်နီးချင်း ရုရှားနိုင်ငံ တောင်ပိုင်းကနေ ခရိုင်းမီးယားကျွန်းဆွယ်ရှိ သိမ်းပိုက်နယ်မြေကို ဦးတည်သွားတဲ့ ရထားတွဲပေါ်က လောင်စာဆီတင် သိုလှောင်ကန်ကြီးတွေ အများအပြား ပျက်စီးခဲ့ပါတယ်။

ယူကရိန်းကတော့ ဒီတံတားကို ခရိုင်းမီးယားကို ပြန်ပေးမယ်လို့ ကတိပြုထားပါတယ်။