ထိုင်း-မြန်မာနယ်စပ် ချင်းရိုင်းခရိုင်နဲ့ ချင်းမိုင်ခရိုင်ထဲမှာ စိတ်ကြွဆေးပြား ၁ သန်းခွဲကျော် ဖမ်းဆီးရမိတယ်လို့ matichon ထိုင်းသတင်းမှာ ဖော်ပြပါတယ်။

ချင်းရိုင်းခရိုင် မယ်ဖာ့လုံမြို့နယ်ထဲမှာ မြန်မာနယ်စပ်ကနေ မူးယစ်ဆေးဝါးဝင်ရောက်မယ့် အကြောင်း ကြိုတင်စုံစမ်းသိရှိရတဲ့အတွက် မူးယစ်နှိမ်နင်းရေး ရဲတပ်ဖွဲ့နဲ့ စစ်တပ်ပါဝင်တဲ့ ပူးပေါင်းအဖွဲ့ဟာ နယ်မြေထဲမှာ လုံခြုံရေးယူနေကြောင်း၊ ဒီဇင်ဘာ ၅ ရက် မနက်အစောပိုင်းမှာတော့ နောက်ခန်းမှာ ကုန်ပစ္စည်းသယ်ဆောင်ဖို့ အခန်းဖွဲ့ပြုပြင်ထားတဲ့ အဖြူရောင်ဟိုင်းလပ်စ်ကား ၁ စီး မယ်ဖာ့လုံမြို့နယ် မဲ့စလောင်းနိုင်းရွာဘက်ကနေ မောင်းဝင်လာတယ်လို့ ဆိုပါတယ်။

ဒါပေမဲ့ အဆိုပါကားဟာ တာဝန်ရှိသူတွေကို လှမ်းတွေ့တာနဲ့ ချင်းရိုင်း မြို့ရှောင်လမ်းဘက်ကနေ မဲ့ယောင်းကျေးရွာ၊ အဲဒီကနေတဆင့် ဖယောင်းမြို့နယ်ဘက် မောင်းသွားကြောင်း၊ တာဝန်ရှိသူတွေက အနောက်က ကားနဲ့လိုက်ဖမ်းပေမဲ့ တနေရာမှာ မျက်ခြည်ပြတ်သွားလို့ လမ်းကြောင်းပေါ်ရှိ ဖန်းမြို့နယ်ရဲတပ်ဖွဲ့ကို လှမ်းပြီး သတင်းပို့လိုက်ပါတယ်။

ဖန်းရဲတပ်ဖွဲ့ဟာ အဆိုပါကားကို ဖဟွန်ယိုးထင်းလမ်းပေါ်မှာ ဖမ်းမိခဲ့ပြီး စစ်ဆေးရာမှာ ကားရှေ့ခန်းမှာ ထိုင်းယာဉ်မောင်း ၁ ယောက်၊ အဖော် ၁ ယောက် လိုက်ပါလာပြီး ကားနောက်ခန်း ကုန်ပစ္စည်းတင်တဲ့နေရာမှာ အံဝှက်ထဲထည့်လာတဲ့ မြွေရေခွံအိတ် ၇ လုံးကို တွေ့ရတယ်လို့ ဆိုပါတယ်။ အိတ် ၁ လုံးစီမှာ စိတ်ကြွဆေး ၂ သိန်းစီ ထည့်ထားတာကြောင့် စုစုပေါင်း ၁ သန်း ၄ သိန်း ဖမ်းမိတယ်လို့ ရဲတပ်ဖွဲ့က ပြောပါတယ်။

အဲဒီနေ့မှာပဲ ချင်းမိုင်ခရိုင် ဖှန်မြို့နယ်ထဲမှာ နောက်ထပ် စိတ်ကြွဆေး ၅၀,၀၀၀ ဖမ်းမိခဲ့တယ်လို့ မယ်ဆိုင်ဒေသသတင်းမှာ ဖော်ပြပါတယ်။

ဒီဇင်ဘာ ၅ ရက် ည ၈ နာရီလောက်က ဒေသတွင်း မူးယစ်ဆေးဝါးနှိမ်နင်းရေးအဖွဲ့၊ စစ်တပ်နဲ့ နယ်မြေခံရဲတွေပါတဲ့ ပူးပေါင်းအဖွဲ့ဟာ ချင်းမိုင်ခရိုင် ဖှန်မြို့နယ် ဝိန်းအုပ်စုထဲမှာ လုံခြုံရေးယူနေစဉ် ဘန့်ဟွေ့မယုန်းကျေးရွာဘက်ကနေ ဆိုင်ကယ်မီးလင်းလာတာ တွေ့ရကြောင်း၊ ဒါကြောင့် အနီးကပ် သွားရောက်စစ်ဆေးရာမှာ အဆိုပါ မော်တော်ဆိုင်ကယ်ထဲမှာ ၉၉၉ အမှတ်တံဆိပ် စိတ်ကြွဆေးပြား ၅၀,၀၀၀ တွေ့ရှိရတယ်လို့ ဆိုပါတယ်။

ဒီကိစ္စနဲ့ပတ်သက်ပြီး ဆိုင်ကယ်မောင်းနှင်လာတဲ့ လားဟူအမျိုးသား နိုင်ကျစဲ့ နဒွေကို ဖမ်းဆီးထားသလို ဆိုင်ကယ်ပိုင်ရှင်နဲ့တကွ နောက်ထပ်ကွင်းဆက်တွေ စုံစမ်းရှာဖွေနေတယ်လို့ ဆိုပါတယ်။

ဒီမတိုင်ခင် ဒီဇင်ဘာ ၃ ရက်ကလည်း မြန်မာနိုင်ငံ မိုင်းဆတ်ခရိုင်တဖက်ကမ်း ထိုင်းနိုင်ငံ မယ့်အိုင်းမြို့နယ်ထဲမှာ မူးယစ်ဆေး သယ်ဆောင်သူနဲ့ ထိုင်းစစ်တပ်ကြား ပစ်ခတ်မှုဖြစ်ပွားပြီး စိတ်ကြွဆေး ၂ သိန်း ဖမ်းမိခဲ့တယ်လို့ မယ်ဆိုင်ပရက်စ်သတင်းမှာ ဖော်ပြပါတယ်။

အဲဒီနေ့က ထိုင်းရိန်းဂျားတပ်ဖွဲ့ဝင်တွေဟာ နယ်စပ်တလျှောက် စစ်ရေးလေ့ကျင့်စဉ် မြန်မာနယ်စပ်နဲ့ မီတာ ၄၀၀ အကွာ တောထဲမှာ အမည်မသိအဖွဲ့ရဲ့ ချောင်းမြောင်းပစ်ခတ်တာ ခံခဲ့ရကြောင်း၊ ထိုင်းစစ်တပ်ဘက်က ပြန်ပစ်ပြီး အသံတွေငြိမ်သွားလို့ နယ်မြေရှင်းလင်းရာမှာ မြွေရေခွံအိတ် ၂ လုံး ကျကျန်ခဲ့တာ တွေ့ရကြောင်း၊ အိတ်ထဲမှာ ၉၉၉ အမှတ်တံဆိပ် စိတ်ကြွဆေး ၂ သိန်းကို ဖမ်းဆီးရမိတာလို့ မယ်ဆိုင်ပရက်စ်သတင်းမှာ ဖော်ပြထားပါတယ်။

ကိုးကား - matichon.co.th