တရုတ်နဲ့ မြောက်ကိုရီးယားတို့ရဲ့ ခြိမ်းခြောက်မှု ဆိုးရွားလှတဲ့ လက်တွေ့ဘဝမှာ ဂျပန်နိုင်ငံဟာ စစ်အသုံးစရိတ်ကို တိုးမြှင့်ဖို့ လိုအပ်တယ်လို့ ဂျပန်အာဏာရ လစ်ဘရယ် ဒီမိုကရက်တစ်ပါတီ (LDP) ရဲ့ အကြီးတန်းအဖွဲ့ဝင်တဦးက ထိုင်ဝမ်ခရီးစဉ်အတွင်း ဒီဇင်ဘာ ၁၁ ရက်က ပြောလိုက်ပါတယ်။

ဒီမိုကရေစီနည်းကျ အုပ်ချုပ်နေတဲ့ ထိုင်ဝမ်နဲ့ ဂျပန်တို့မှာ တရားဝင် သံတမန်ဆက်ဆံရေး မရှိကြပေမဲ့ တရားဝင်မဟုတ်တဲ့ ဆက်ဆံရေးရှိပြီး နှစ်နိုင်ငံစလုံးမှာ တရုတ်နဲ့ပတ်သက်တဲ့ စိုးရိမ်ပူပန်မှုတွေ ရှိနေတာပါ။ အထူးသဖြင့် နှစ်နိုင်ငံလုံးအနားမှာ စစ်ရေးလှုပ်ရှားမှုတွေ တိုးလာနေပါတယ်။

လက်ရှိအာဏာရ ဂျပန်ပါတီ LDP ရဲ့ မူဝါဒရေးရာ အကြီးအကဲနဲ့ စက်မှုဝန်ကြီးဟောင်း တဦးဖြစ်သူ ကိုအိချိ ဟငိဥဒါ့ဟာ ထိုင်ဝမ်မြို့တော် တိုင်ပေဆီ လာရောက်လည်ပတ်ချိန်မှာ ခုလို ပြောလိုက်တာပါ။

ဂျပန်နိုင်ငံဟာ ဒုတိယကမ္ဘာစစ်ကတည်းက ငြိမ်းချမ်းရေးလမ်းစဉ်ကို လျှောက်လှမ်းခဲ့ပြီး ဒီလမ်းကြောင်းဟာ အနာဂတ်မှာ ပြောင်းလဲမှာ မဟုတ်ဘူးလို့လည်း သူကပြောပါတယ်။

ဂျပန်ဝန်ကြီးချုပ် ဖှုမိအို ခိရှိဒါ့ဟာ လာမယ့်နှစ်ဘတ်ဂျက်ကို ပြင်ဆင်နေပြီး အခု ၁ ရာခိုင်နှုန်းကနေ ငါးနှစ်အတွင်း ကာကွယ်ရေးအသုံးစရိတ်ကို ပြည်တွင်း အသားတင် ထုတ်လုပ်မှုရဲ့ ၂ ရာခိုင်နှန်းနဲ့ညီမျှတဲ့ ပမာဏကို မြှင့်တင်ဖို့ အစီအစဉ်တွေ ကြေညာထားပြီးပါပြီ။

ဒါကြောင့် ဂျပန်ရဲ့ နှစ်စဉ်ကာကွယ်ရေးအသုံးစရိတ်ဟာ လက်ရှိ ယန်းငွေ ၅ ဒသမ ၄ ထရီလီယံမှ ယန်း ၁၁ ထရီလီယံ (ဒေါ်လာ ၈၀ ဒသမ ၅၅ ဘီလီယံ) ကျော်အထိ ရှိမှာဖြစ်ပြီး လက်ရှိအဆင့်မှာ အမေရိကန်နဲ့ တရုတ်ပြီးရင် ကမ္ဘာ့တတိယအကြီးဆုံး စစ်ရေးအသုံးစရိတ်ကို ဂျပန်နိုင်ငံကို ပေးအပ်မှာလည်း ဖြစ်ပါတယ်။