ပါကစ္စတန်နိုင်ငံ လာဟိုးမြို့ရှိ စစ်သွေးကြွအဖွဲ့ ခေါင်းဆောင်ရဲ့ နေအိမ်အနီး ဗုံးခွဲမှုရဲ့ နောက်ကွယ်မှာ အိန္ဒိယအစိုးရရှိနေတယ်လို့  ပါကစ္စတန်ပြည်ထဲရေးဝန်ကြီးက ဒီဇင်ဘာ ၁၃ ရက်မှာ စွပ်စွဲ ပြောကြားလိုက်ပါတယ်။

အိန္ဒိယနိုင်ငံ၊ မွမ်ဘိုင်းမြို့မှာ ၂၀၀၈ ခုနှစ် အသေခံဗုံးခွဲတိုက်ခိုက်မှုအတွက် အပြစ်တင်ခံရတဲ့ စစ်သွေးကြွအဖွဲ့တည်ထောင်သူ ဟာဖစ်ဇ် ဆာအိရဲ့ အိမ်နားမှာ   ၂၀၂၁ ခုနှစ်က ဗုံးခွဲမှု ဖြစ်ပွားခဲ့တာပါ။

ဒီဖြစ်စဉ်မှာ အသေခံဗုံးခွဲသမားဟာ ဆာအိရဲ့ အိမ်အပြင်ဘက်က ရဲစစ်ဆေးရေးဂိတ်တခုဆီ ကားတစီးနဲ့ ဝင်တိုက်ခဲ့ရာ ပါကစ္စတန်အရှေ့ပိုင်း လာဟိုးမြို့မှာ လူလေးဦး သေဆုံးခဲ့ပြီး သူ့ရဲ့မိသားစုတော့ ထိခိုက်ဒဏ်ရာမရခဲ့ပါဘူး။

ပါကစ္စတန်ရဲ့ စွပ်စွဲချက်နဲ့ ပတ်သက်လို့ အိန္ဒိယနိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ရိုက်တာသတင်းဌာနရဲ့ မှတ်ချက်ပေးဖို့ တောင်းဆိုချက်ကို တုံ့ပြန်ခြင်း မရှိပါဘူး။

အိန္ဒိယဟာ ဒေသတွင်းရှိ ပစ်မှတ်တွေကို တိုက်ခိုက်နေသလို အစ္စလာမ္မစ်စစ်သွေးကြွတွေကို ပံ့ပိုးကူညီနေတယ်လို့ ပြိုင်ဘက်ဟောင်း ပါကစ္စတန်က ဆယ်စုနှစ်များစွာ စွပ်စွဲခဲ့တာပါ။ ခုတကြိမ်မှာတော့ ပါကစ္စတန်က ခွဲထွက်ရေးသူပုန်တွေကို အိန္ဒိယက ထောက်ပံ့နေတယ်လို့ ထပ်စွပ်စွဲလိုက်ပါတယ်။