ထိုင်းရာဇဝင် ဇာတ်လမ်းတွဲတွေမှာ လူသိများထင်ရှားတဲ့ သရုပ်ဆောင် မင်းသမီး ယဲမ်းထမွန်းဖမ်း ဟာ လောင်းကစားဒိုင်ဖွင့်မှု၊ ကမ္ဘာ့ဖလားဘောလုံးပွဲ မူပိုင်ခွင့်ချိုးဖောက်မှု၊ ငွေကြေးခဝါချမှုတွေနဲ့ ဖမ်းဆီးခံထားရတယ်လို့ ထိုင်းသတင်းတွေမှာ ဖော်ပြပါတယ်။

မင်းသမီးနဲ့ သူ့ရဲ့ခင်ပွန်းဖြစ်သူ နိုင်းဖူမိဖတ်(ခ)အမ့် တို့ဟာ ဝက်ဘ်ဆိုက်တွေဖွင့်ပြီး အွန်လိုင်း လောင်းကစားတာ၊ ကမ္ဘာ့ဖလားဘောလုံးပွဲ မူပိုင်ခွင့်မရဘဲ ခိုးယူပြသတာ၊ ညစ်ညမ်းဗွီဒီယို ပြသတာတွေကြောင့် အထူးစုံစမ်းရေးရဲတပ်ဖွဲ့ဝင်တွေက ၂ နှစ်ကြာ အချိန်ယူထောက်လှမ်းကာ ပြီးခဲ့တဲ့ ဒီဇင်ဘာ ၁၆ ရက်မှာ သူတို့အိမ်ကို ဝင်ရောက်စစ်ဆေးဖမ်းဆီးခဲ့တာပါ။

အဆိုပါစစ်ဆေးမှုကနေ စုစုပေါင်း ဘတ်သန်းပေါင်း ၇၀၀ ကျော်တန်ဖိုးရှိ နောက်ဆုံးပေါ်ဇိမ်ခံကား ၁၃ စီး ၊ ဆိုင်ကယ် ၂ စီး ၊  ကြီးကျယ်ခမ်းနားတဲ့ တိုက် ၄ လုံး ၊ အိမ်မှာသိမ်းထားတဲ့ ငွေစက္ကူ ဘတ် ၄၂ သန်း ၊ ၁ လုံးလျှင် ၁၀ သန်းအထက်တန်ဖိုးကြီး နာရီ ၈ လုံး ၊  ၁ လုံးလျှင် ဘတ်သန်းနဲ့ချီတန်တဲ့ သားရေလက်ပွေ့အိတ် အလုံး ၅၀ ၊ ဘဏ်စာရင်းစာအုပ် ၄၄ အုပ်တို့ကို သိမ်းဆည်းလိုက်ပါတယ်။

ဒါဟာ ကနဦး သိမ်းဆည်းမှုသာဖြစ်ကြောင်း၊ သူတို့ဖွင့်ထားတဲ့ ဝက်ဆိုက်မှာ ပါဝင်လောင်း ကစားသူဦးရေ သောင်းနဲ့ချီရှိပြီး လုပ်ငန်းလည်ပတ်ငွေပေါင်း ဘတ်သန်းပေါင်း ၇၀၀၀ ရှိတာကြောင့် သူတို့ရဲ့ပိုင်ဆိုင်မှုမှာ ဘတ်သန်းပေါင်း ၂၀၀၀ ကျော်ရှိမယ်လို့ ခန့်မှန်းကြောင်း၊ ဒါကြောင့် ကျန်တဲ့ ပိုင်ဆိုင်မှုတွေ ဆက်လက်စစ်ဆေးသိမ်းဆည်းသွားမယ်လို့ ထိုင်းအမျိုးသား ရဲတပ်ဖွဲ့က ဒီဇင်ဘာ ၁၇ ရက်သတင်းစာရှင်းပွဲမှာ ပြောပါတယ်။

သရုပ်ဆောင် ယဲမ်းထမွန်းဖမ်းဟာ  အသက် ၁၅ နှစ်အရွယ်ကတည်းက ရုပ်ရှင်လောကထဲ ဝင်ရောက်ပြီး နန်းတွင်းရာဇဝင်ဇာတ်ကားတွေ အများဆုံးရိုက်ကူးခဲ့ပါတယ်။ 

သူ လက်ထပ်ပြီးတဲ့နောက် ရုပ်ရှင်မရိုက်တော့ဘဲ သူဌေးသားနဲ့ရလို့ အကောင်းစား ပစ္စည်းတွေ သုံးနိုင်ဖြုန်းနိုင်ကြောင်း အွန်လိုင်းပေါ် ကြွားဝါခဲ့ပါတယ်၊ ဒီနှစ် မတ်လက တရတ်ခရိုင်ရှိ အပန်းဖြေဟိုတယ်တစ်ခုမှာ သွားရောက်တည်းခိုစဉ် ဟိုတယ်မီးလောင်တာနဲ့ ကြုံပြီး မိသားစုတွေ အသက်လုပြေးခဲ့ရကြောင်း၊ ခင်ပွန်းဖြစ်သူရဲ့ ဘတ်သန်း ၂၀ ကျော်တန်လက်ပတ်နာရီလည်း မီးထဲ ပါသွားတယ်လို့ သတင်းထောက်တွေကို ပြောခဲ့ပါတယ်။ 

သူတို့လင်မယားမှာ ကလေး ၃ ယောက်ရှိပြီး အငယ်ဆုံးမှာ ၅ လရွယ်သာ ရှိပါသေးတယ်။ လင်မယား နှစ်ယောက်လုံး အာမခံမရဘဲ အကျဉ်းထောင်ထဲ ရောက်နေပြီး သူတို့နဲ့အတူ ပူးပေါင်းလုပ်ကိုင်နေတဲ့ နောက်ထပ် ၆ ဦးကိုလည်း ဖမ်းဆီးအရေးယူသွားမယ်လို့ ရဲတပ်ဖွဲ့က ပြောပါတယ်။ 

ကိုးကား-PPTV