ယူကရိန်းသမ္မတ ဗိုလိုဒီမာ ဇလန်းစကီးက သူ့နိုင်ငံထဲမှာ အီရန်လုပ် ဒရုန်းအစင်း ၃၀ ကို ဒီဇင်ဘာ ၁၉ ရက် တရက်တည်းမှာ ပစ်ချခဲ့တယ်လို့ သူ့ရဲ့ ညစဉ်ပြောနေတဲ့ မိန့်ခွန်းမှာ ပြောလိုက်ပါတယ်။

ယူကရိန်းစစ်ဌာနချုပ်ကလည်း သူတို့ရဲ့ လေကြောင်းရန်ကာကွယ်ရေးတပ်တွေက မြို့တော် ကိယက်ဗ်ရဲ့ ကောင်းကင်ယံမှာ အများစုဖြစ်တဲ့ ဒရုန်း ၂၈ စင်းထဲက ၂၃ စင်းကို ပစ်ချခဲ့တယ်လို့ အစောပိုင်းက ပြောပါတယ်။

ဒါဟာ ခြောက်ရက်အတွင်း ရုရှားအစိုးရရဲ့ တတိယမြောက် လေကြောင်းတိုက်ခိုက်မှုဖြစ်ပြီး အပူချိန် ရေခဲမှတ်အောက် သုညဒီဂရီအောက်ထိ ကျဆင်းနေတဲ့ အအေးဒဏ်တွေကြားမှာ အကြီးအကျယ် မီးပျက်နေတဲ့ ယူကရိန်းဓာတ်အားလိုင်းကို ပစ်မှတ်ထား တိုက်ခိုက်နေတာ ဖြစ်ပြီး အောက်တိုဘာလနောက်ပိုင်းမှာ ဆက်တိုက် တိုက်ခိုက်နေတာပါ။

မောင်းသူမဲ့လေယာဉ်နဲ့ တိုက်ခိုက်မှုကြောင့် ထိခိုက်သေဆုံးမှုမရှိဘူးလို့ ယူကရိန်း စစ်ဌာနချုပ်က ညနေခင်း နောက်ဆုံးရ သတင်းထုတ်ပြန်ချက်မှာ ပြောခဲ့ပါတယ်။

ဒုတိယကမ္ဘာစစ်နောက်ပိုင်း ဥရောပမှာ အကြီးဆုံးဖြစ်တဲ့ ယူကရိန်းမှာ ၁၀ လကြာ ပဋိပက္ခအတွင်း လူပေါင်း သောင်းနဲ့ချီ သေဆုံးခဲ့တာပါ။ သန်းနဲ့ချီတဲ့လူတွေ အိုးအိမ်စွန့်ခွာခဲ့ရပြီး မြို့တွေ ပြိုပျက်ခဲ့ပါတယ်။

ယူကရိန်းအရှေ့ပိုင်း ဒန်ညက်စ်ပြည်နယ်မှာ ရုရှားတပ်တွေ ချီတက်ဖို့ ကြိုးပမ်းနေချိန်မှာ လက်နက်ကိုင်တပ်ဖွဲ့တွေဟာ သီတင်းပတ်ပေါင်းများစွာအတွင်း အပြင်းထန်ဆုံး တိုက်ပွဲတွေ ဖြစ်နေတဲ့ ဘာမွတ်မြို့ကို အခိုင်အမာ ဆုပ်ကိုင်ထားတယ်လို့ ဇလန်းစကီးက ပြောပါတယ်။