တောင်ပစိဖိတ်ဒေသရှိ ဖီဂျီနိုင်ငံမှာ နိုင်ငံလုံးဆိုင်ရာ ရွေးကောက်ပွဲအပြီး သက်တမ်းရှည် ဝန်ကြီးချုပ် ဖရန့်ခ် ဘီအိုင်နင်မားရာမာရဲ့ ဖီဂျီပထမပါတီကို ဖယ်ရှားပြီးနောက် ဖီဂျီနိုင်ငံရဲ့ အစိုးရအဖွဲ့သစ်ကို ဖွဲ့ဖို့ ပါတီ ၃ ခု ပေါင်းစည်းခဲ့ရာမှာ ပထမဆုံးအကြိမ် ခေါင်းဆောင်အသစ်ကို ရွေးချယ်ဖို့ ရှိနေပါတယ်။

ဆိုရှယ်ဒီမိုကရက်တစ် လစ်ဘရယ်ပါတီ (SODELPA)၊ စီတီဗန်နီ ရာဘူကာရဲ့ ပြည်သူ့မဟာမိတ်ပါတီ (PA) နဲ့ အမျိုးသားဖက်ဒရေးရှင်းပါတီ (NFP) တို့ဟာ ညွန့်ပေါင်းဖွဲ့ဖို့ ဆုံးဖြတ်ထားကြောင်း ပါလီမန်မှာ နေရာ ၃ ခု ရထားတဲ့ SODELPA က ဒီဇင်ဘာ ၂၀ ရက်မှာ ကြေညာခဲ့ပါတယ်။

ပြီးခဲ့တဲ့သီတင်းပတ်က ကျင်းပခဲ့တဲ့ အမျိုးသားရွေးကောက်ပွဲအပြီးမှာ ဝန်ကြီးချုပ်ဟောင်း ဘီအိုင်နင် မားရာမာနဲ့ ပြည်သူ့မဟာမိတ်ပါတီတို့ ၂ ရက်ကြာ ဆွေးနွေးညှိနှိုင်းပြီးနောက် ဆုံးဖြတ်ချက် ထွက်ပေါ်လာတာ ဖြစ်ပါတယ်။

ညွန့်ပေါင်းအစိုးရသစ်ဟာ ပါလီမန်မှာ ၂၉ နေရာ ရရှိမှာဖြစ်ပြီး ဖီဂျီ ပထမပါတီက ၂၆ နေရာ ရရှိမယ်လို့ FBC ရုပ်မြင်သံကြား အသံလွှင့်ဌာနက ဆိုပါတယ်။

ဖီဂျန်လူမျိုးတွေဟာ မြို့တော်ဆူဗာရဲ့ လမ်းမတွေပေါ်ကို ချီတက်ပြီး “ဝန်ကြီးချုပ်သစ်” လို့ ကြွေးကြော်အော်ဟစ် အားပေးကာ မီးရှူးမီးပန်းတွေ ပစ်လွှတ်ခဲ့ကြပါတယ်။

ပြည်သူ့မဟာမိတ်ပါတီခေါင်းဆောင် စီတီဗန်နီရာဘူကာက သူ့အသက် ၇၄ နှစ်မှာ ဒီတိုင်းပြည်ကြီးကို ထပ်ပြီး ဦးဆောင်ခွင့်ပေးတဲ့ ဘုရားသခင်နဲ့ ပြည်သူတွေကို ကျေးဇူးတင်ကြောင်း ပြောသွားပါတယ်။