နယူးကာဆယ်တောင်ပံကစားသမားအယ်လ်မီရွန်ဟာ သူ့ရဲ့ ပရီးမီးယားလိဂ် လေးရာသီစာ သွင်းဂိုးအရေ အတွက်ကို အခုနှစ်ရာသီမှာ ၁၆ ပွဲတည်းနဲ့ လိုက်မီခဲ့ပါတယ်။

ပါရာဂွေးကစားသမားဟာ မနေ့ညက လက်စတာနဲ့ပွဲစဉ်မှာ အနိုင်ဂိုးတစ်ဂိုးထပ်သွင်းခဲ့ပြီး ပရီးမီးယားလိဂ် ၁၆ ပွဲကစားအပြီးမှာ ၉ ဂိုးသွင်း ယူနိုင်ခဲ့တာပါ။

အသက် ၂၈ နှစ်ရှိ အယ်လ်မီရွန်ဟာ ပြီးခဲ့တဲ့ လေးနှစ်တာကာလအတွင်းမှာ ၉ ဂိုးသာသွင်းယူနိုင်ခဲ့ပြီး အခုနှစ်ရာသီမှာ ၁၆ ပွဲကစားအပြီး သွင်းဂိုးအရေအတွက်နဲ့ တူညီသွားခဲ့တာပါ။

သူဟာ ၂၀၁၉ ခုနှစ် ဇန်နဝါရီအပြောင်းအရွှေ့မှာ အမေရိကန်ကလပ် အက်တလန်တာယူနိုက် တက်ကနေ ပြောင်းရွှေ့လာခဲ့တာပါ။ ပထမဦးဆုံးရာသီဝက်ကာလမှာ ဂိုးမရခဲ့ဘဲ ၂၀၁၉-၂၀၂၀ ရာသီနဲ့ ၂၀၂၀-၂၀၂၁ ရာသီတွေမှာ ၄ ဂိုး စီ သွင်းခဲ့ပြီး မနှစ်တုန်းက ၁ ဂိုး ပဲသွင်းယူနိုင်ခဲ့တာဖြစ်ပါတယ်။