တရုတ်နိုင်ငံအတွင်း ကိုဗစ်-၁၉ ကပ်ရောဂါ တုံ့ပြန်ရေး အကောင်းဆုံးဖြစ်အောင်လုပ်ဖို့ အစီအစဥ်တချို့ကို ဒီဇင်ဘာလအစောပိုင်းမှာ ထုတ်ပြန်ကြေညာခဲ့ပြီးကတည်းက တရုတ်နိုင်ငံ မြို့တွေက ဆေးရုံတွေဟာ ကိုဗစ်-၁၉ လူနာတွေကို ကုသဖို့ အရှိန်မြှင့် ကြိုးပမ်းနေပါတယ်။

အခုလအစောပိုင်းကစပြီး ကိုဗစ်-၁၉ ကူးစက်ခံ နာတာရှည်ရောဂါအခံရှိတဲ့ ဝေဒနာရှင်တွေအတွက် ပိုကောင်းကောင်း ကုသပေးနိုင်ရေး ကြိုးပမ်းနေပါတယ်။

တရုတ်နိုင်ငံအလယ်ပိုင်း ဟော့ဘေးပြည်နယ်က ဆေးရုံတွေမှာ ဆေးရုံကုတင် အရေအတွက်ကို တိုးမြှင့်ခဲ့ပြီး လက်ခံလူနာတွေကို အမျိုးအစားခွဲထားတဲ့ စီမံခန့်ခွဲမှု အောက်မှာ ထားရှိခဲ့ပါတယ်။

ပြင်းထန်တဲ့ရောဂါသည်တွေအတွက် ညှိနှိုင်းကုသရေး ယန္တရားတရပ်ကို တရုတ်နိုင်ငံ အနောက်တောင်ပိုင်း ချုံချင်းမြူနီစီပယ်ဒေသ ဘီရှန်းခရိုင်မှာ ထူထောင်ထားပါတယ်။

ကျေးလက်ဒေသက နာတာရှည်ရောဂါအခံရှိတဲ့ ကလေးတွေ၊ သက်ကြီးရွယ်အိုတွေနဲ့ ဖြစ်နိုင်ခြေမြင့်မားတဲ့ အုပ်စုတွေအတွက် လွှဲပြောင်းကုသမှုကို တိုးမြှင့် ဆောင်ရွက်နေပါတယ်။

မြို့တော် ပေကျင်းက တက္ကသိုလ် ပထမဆေးရုံဟာလည်း ခုလအစောပိုင်းကတည်းက ဆက်တိုက်မြင့်တက်နေတဲ့ ကိုဗစ်-၁၉ ရောဂါကူးစက်မှု လှိုင်းလုံးကြီးကို တွန်းလှန်နိုင်ဖို့ ပြင်းထန် အသက်ရှူလမ်းကြောင်းဆိုင်ရာ ရောဂါဖြစ်ပွားမှုအတွက် လူနာဆောင်အသစ်နဲ့ ပြည့်စုံတဲ့ အထူးကြပ်မတ်ကုသဆောင်အသစ်ကို ဖွင့်လှစ်လိုက်ပါတယ်။

တနေ့ကို လူ ၂၀၀ လောက်လက်ခံတဲ့ အရေးပေါ်ခန်းဟာ ခုတော့ တရက်ကို အကြမ်းဖျင်း လူနာ ၅၀၀ လောက် လက်ခံရရှိနေပြီး သူတို့ထဲက ငါးပုံတပုံလောက်က ပြင်းထန်ပြီး စိုးရိမ်ရတဲ့ အခြေအနေမှာ ရှိနေတယ်လို့ ဆေးရုံအကြီးအကဲ ယန်ယဉ်မိုက ပြောပါတယ်။

ကိုဗစ်-၁၉ ကူးစက်ခံပြီး နာလံပြန်ထလာခဲ့တဲ့ ဆရာဝန်တွေနဲ့ သူနာပြုအများအပြားကလည်း သူတို့ရဲ့ ရာထူးနေရာတွေမှာ တာဝန်ပြန်ထမ်းနေကြပြီး အသစ်ဖွဲ့စည်းထားတဲ့ လူနာဆောင်တွေမှာ သူတို့ရဲ့ သက်ဆိုင်ရာကဏ္ဍအလိုက် အသီးသီး ပါဝင်ဆောင်ရွက်နေကြပြီ ဖြစ်ပါတယ်။