လော့စ်အိန်ဂျလိစ်မြို့အနီး တရုတ်နှစ်သစ်ကူးချိန် သေနတ်ပစ်ခတ်မှုဖြစ်ပြီး ၁၀ ဦးသေဆုံး
အမေရိကန်နိုင်ငံ၊ ကယ်လီဖိုးနီးယားပြည်နယ်၊ လော့စ်အိန်ဂျလိစ်မြို့အနီး မွန်တယ်ရေပတ်ခ်မြို့မှာ ဇန်နဝါရီ ၂၂ ရက် တရုတ်နှစ်သစ်ကူးပွဲတော်ကာလမှာ သေနတ်နဲ့ပစ်ခတ်မှုဖြစ်ခဲ့လို့ လူ ၁၀ ဦးသေဆုံးကာ ၁၀ ဦး ဒဏ်ရာရသွားတယ်လို့ CNBC သတင်းမှာ ဖော်ပြပါတယ်။
ပစ်ခတ်ခဲ့သူဟာ အသက် ၇၂ နှစ်အရွယ် ဟူကန်ထရန်ဆိုသူဖြစ်တယ်လို့ လော့စ်အိန်ဂျလိစ်ရဲတပ်ဖွဲ့ တာဝန်ရှိသူက ပြောကြားလိုက်ပြီး ပစ်ခတ်သူဟာလည်း သူ့ကိုယ်သူ သေနတ်နဲ့ပစ်ခတ်လို့ ရတဲ့ဒဏ်ရာနဲ့ သေဆုံးခဲ့ပုံရတယ်လို့ ဆိုပါတယ်။
ဒေသစံတော်ချိန် ည ၁၀ နာရီနောက်ပိုင်းမှာ မွန်တယ်ရေပတ်ခ်မြို့ရဲ့ တရုတ်နှစ်သစ်ကူး အခမ်းအနားကျင်းပရာ ကပွဲခန်းမအနီးတဝိုက် တနေရာမှာ ဒီပစ်ခတ်မှု ဖြစ်ပွားခဲ့တာဖြစ်ပြီး ဘာကြောင့်ပစ်ခတ်ရတယ်ဆိုတဲ့ အကြောင်းရင်းကိုတော့ မသိရသေးပါဘူး။
အဲဒီနေ့အစောပိုင်းတုန်းက နှစ်သစ်ကူးပွဲတော်ကို လူသောင်းနဲ့ချီ လာရောက်ခဲ့ကြတာ ဖြစ်ပါတယ်။
အခင်းဖြစ်ပွားရာ မွန်တာရေးပတ်ခ်မြို့ဟာ လော့စ်အိန်ဂျလိစ်မြို့နယ်ထဲမှာ ပါဝင်ပြီး လော့စ်အိန်ဂျလိစ် မြို့လယ်ခေါင်ကနေ ၇ မိုင်အကွာမှာ တည်ရှိကာ ရဲတပ်ဖွဲ့ကလည်း အခင်းဖြစ်ရာကို ရောက်ရှိလာပြီး စုံစမ်းစစ်ဆေးမှုတွေ ပြုလုပ်နေပါတယ်။
