ထိုင်းနိုင်ငံအလယ်ပိုင်း၊ ဥထိုင်းဌာနီမြို့မှာ  ၁ နှစ်ရွယ် ကြောင်မလေး တကောင် ပျောက်ဆုံးသွားတဲ့အတွက်  ပြန်တွေ့အောင်ရှာပေးနိုင်သူကို ဘတ်ငွေ ၁ သိန်း ဆုချမယ်လို့ ပိုင် ရှင်ဖြစ်သူက ကြော်ငြာထားပါတယ်။

ကြောင်ကလေးအမည်မှာ နောင့်အက်ပ်ပါးလ် ( Apple ) ဖြစ်ပြီး  ခန္ဓာကိုယ်မှာ အဖြူရောင် ခြေလက်နဲ့အမြီးတွေမှာ အနက်ရောင် အမွေးရှိကြောင်း၊  အဆိုပါကြောင်ကို မွေးကတည်းက ကျွေးမွေးပြုစုလာခဲ့ပြီး၊ လွန်ခဲ့တဲ့ ၁၀ ရက်က ကြောင်လေးနေမကောင်းလို့  ဥထိုင်းဌာနီတိရစ္ဆာန် ဆေးခန်းကို သွားပြစဉ် လမ်းခုလတ်မှာ လွတ်ထွက်သွားပြီး ပျောက်ဆုံးသွားခဲ့တာလို့ ပိုင်ရှင်ဖြစ်သူ နိုင်းကျီလာယု ဆုဖန်းကွန်းက သတင်းထောက်တွေကို ပြောပါတယ်။ 

သူဟာ ကြောင်လေးပေါ်သံယောဇဉ်ကြီးလို့ မစားနိုင်၊ မအိပ်နိုင် နေ့ရောညပါ ကြိုးစား ရှာဖွေခဲ့ကြောင်း၊ ကြောင်လွှတ်ထွက်သွားတဲ့နေရာမှာ အမွှေးတိုင်ထွန်းပြီး နတ်ကောင်းနတ်မြတ်တွေကို တိုင်တည်သလို ဘုန်းကြီးကျောင်းမှာလည်း သွားရောက် ဆုတောင်းခဲ့ကြောင်း၊ ဒါ့အပြင် ကြောင်တွေ့တဲ့သူကို ဆုငွေ ဘတ် တသောင်းပေးမယ်လို့ ကြော်ငြာခဲ့ပေမယ့် ၁၀ ရက်ကျော်ကြာတဲ့ထိ မတွေ့သေးတာကြောင့် ဆုငွေကို ဘတ် ၁ သိန်းထိ တိုးပေးလိုက်တာလို့ ဆိုပါတယ်။

နောင့်အက်ပါးလ်ကို ရှာဖွေတွေ့ရှိသူအနေနဲ့ ဖုံးနံပါတ်  ၀၉ ၅၆၄၀ ၉၂၆၀ ကိုဆက်သွယ်နိုင်တယ်လို့ ထိုင်းသတင်းတွေမှာ ဖော်ပြပါတယ်။