ကမ္ဘာ့အဆင့်တစ် နာမည်ကြီးတင်းနစ်ကစားသမား နိုဗက်ခ် ဂျိုကိုဗစ်ဟာ နောက်လထဲမှာ စတင်ကျင်းပမယ့် အင်ဒီယန်းဝဲလ်စ်ပြိုင်ပွဲနဲ့ မိုင်ယာမီအိုးပင်းပြိုင်ပွဲ စတဲ့ ATP Masters 1000 ပြိုင်ပွဲတွေမှာ ယှဉ်ပြိုင်ဖို့အတွက် အမေရိကန်ကို ဝင်ရောက်ခွင့် အထူးခွင့်ပြုချက် လျှောက်ထားပြီး မကြာခင်မှာရလိမ့်မယ်လို့ မျှော်လင့်ကြောင်း ပြောပါတယ်။

ကိုဗစ်-၁၉ ကာကွယ်ဆေးထိုးဖို့ ငြင်းဆန်ထားတဲ့ ထိပ်တန်းအားကစားသမားတဦးဖြစ်တဲ့ ဂျိုကိုဗစ်ဟာ ပြီးခဲ့တဲ့လက ၁ဝ ကြိမ်မြောက် သြစတြေးလျအိုးပင်းပြိုင်ပွဲနဲ့ ၂၂ ကြိမ်မြောက် ဂရန်းဆလမ်း ချန်ပီယံဆုကို စံချိန်တင် ရရှိခဲ့ပြီးနောက်မှာ လာမယ့်အပတ် ဒူဘိုင်းမှာ ကျင်းပမယ့် ATP ခရီးစဉ်ကို ပြန်လာဖို့ရှိကြောင်း ဂျိုကိုဗစ်က ဘဲလ်ဂရိတ်မြို့မှာ လေ့ကျင့်မှုအပြီး သတင်းထောက်တွေကို ပြောပါတယ်။

လာမယ့် မတ်လ ၉ ရက်နေ့မှာ အင်ဒီယန်းဝဲလ်စ်ပြိုင်ပွဲအတွက် အဓိက မဲခွဲဆုံးဖြတ်မှုကို စတင်မှာဖြစ်ပြီး မတ်လနှောင်းပိုင်းမှာပဲ မိုင်ယာမီအိုးပင်းပြိုင်ပွဲကို ကျင်းပသွားမှာ ဖြစ်ပါတယ်။ အဲ့ဒီအချိန်မတိုင်ခင်အထိ အမေရိကန်နိုင်ငံမှာ နိုင်ငံခြားသားလေကြောင်းခရီးသွားတွေအတွက် ကာကွယ်ဆေးထိုးနှံမှု လိုအပ်ချက်ကို မရုပ်သိမ်းသေးတာကြောင့် ဒီပြိုင်ပွဲတွေကို ဂျိုကိုဗစ်အနေနဲ့ ၂ နှစ်ဆက်တိုက် လွဲချော်ရဖွယ် ရှိနေပါတယ်။

သမ္မတ ဂျိုးဘိုင်ဒင် အစိုးရအဖွဲ့ကတော့ ကိုဗစ်ဆိုင်ရာ အရေးပေါ်ကြေညာချက်တွေကို လာမယ့်မတ်လ ၁၁ ရက်မှာ ရုပ်သိမ်းသွားမယ်လို့ ပြီးခဲ့တဲ့လက ပြောထားပါတယ်။

ဒါပေမဲ့လည်း အင်ဒီယန်းဝဲလ်စ် ပြိုင်ပွဲဝင်စာရင်းမှာ ဂျိုကိုဗစ်နာမည် ပါဝင်လာခဲ့ပြီး သူ့အနေနဲ့လည်း အထူးဝင်ရောက်ခွင့်အတွက် လိုအပ်တဲ့စာရွက်စာတမ်းတွေကို တင်ပြထားပြီး ဖြစ်တယ်လို့ ပြောပါတယ်။

မနှစ်တုန်းကလည်း ကာကွယ်ဆေးမထိုးထားတဲ့ အခြေအနေကြောင့် သြစတြေးလျနိုင်ငံကနေ ပြည်နှင်ဒဏ်ပေးခံခဲ့ရတဲ့ ဂျိုကိုဗစ်ဟာ အဓိကပြိုင်ပွဲကြီးတခုဖြစ်တဲ့ သြစတြေးအိုးပင်း ပြိုင်ပွဲကိုပါ လွဲချော်ခဲ့ပါတယ်။ သူကတော့ ကိုဗစ်ဆေး ထိုးမယ့်အစား ဂရန်းစလမ်းပြိုင်ပွဲတွေ ကိုသာ ကျော်သွားလိုက်မယ်လို့ ပြောခဲ့ဖူးပါတယ်။