ယူကရိန်းက နွေဦးထိုးစစ်အတွက် ပြင်ဆင်နေချိန်မှာပဲ ဝါရှင်တန်အနေနဲ့ ကိဗ်အတွက် အမေရိကန်ဒေါ်လာ ၂ ဘီလီယံ တန်ဖိုးရှိတဲ့ နောက်ထပ်လက်နက်အမျိုးမျိုးကို ထောက်ပံ့ပေးသွား မယ်လို့ ရုရှားကျူးကျော်စစ် တနှစ်ပြည့်မြောက်တဲ့ ဖေဖော်ဝါရီ ၂၄ ရက်မှာ အမေရိကန်အစိုးရက ကြေညာခဲ့ပါတယ်။ 

မော်စကိုရဲ့ စစ်တိုက်နိုင်စွမ်း လျော့နည်းလာအောင် ရည်ရွယ်ပြီးတော့ ရုရှားနဲ့ သူ့ရဲ့မဟာမိတ်တွေ အပေါ်  ပို့ကုန်ထိန်းချုပ်မှုနဲ့ အခွန်စည်းကြပ်မှုဆိုင်ရာ အရေးယူပိတ်ဆို့မှု အသစ်တွေကိုလည်း အမေရိကန်က ကြေညာခဲ့ပါတယ်။ 

နောက်ထပ်ပေးမယ့် စစ်ရေးအကူအညီတွေထဲမှာ ယူကရိန်းတောင်းဆိုထားတဲ့ F-16 ဖိုက်တာဂျက် လေယာဉ်တွေ မပါဝင်ပေမယ့် ရွေ့လျားနိုင်စွမ်းမြင့်မားတဲ့ ဒုံးကျည်အမြောက်စနစ် (HIMARS) အတွက် ခဲယမ်းတွေအပါအဝင် Switchblades နဲ့ CyberLux K8 တို့လို မတူညီတဲ့ ဒရုန်းအမျိုးအစားတွေလည်း ပါဝင်ကြောင်း ပင်တဂွန်စစ်ဌာနချုပ်ရဲ့ ပြန်ကြားရေးအရာရှိ လေတပ်ဗိုလ်မှူးချုပ် ပက်ထရစ်ခ် ရိုက်ဒါ က သတင်းရှင်းလင်းပွဲမှာ အသေးစိတ်ပြောဆိုခဲ့ပါတယ်။ 

“ယူကရိန်းပြည်သူအနေနဲ့ ခုခံနိုင်ဖို့တင်မဟုတ်ဘဲ စစ်မြေပြင်က မျှခြေပြောင်းလဲနိုင်ဖို့အတွက် လိုအပ်တဲ့ ထိုးစစ်စွမ်းရည်ကိုပါ ထောက်ပံ့ပေးနေတာ။” 

ဒီလက်နက်တွေဟာ “ယူကရိန်း လုံခြုံရေးဆိုင်ရာ ထောက်ပံ့မှု” လို့ သိထားကြတဲ့ ရန်ပုံငွေထဲက လာတာဖြစ်ပြီး ဒီထဲမှာ ဘိုင်ဒင်အစိုးရက လိုအပ်တဲ့လက်နက်တွေကို အမေရိကန် သိုလှောင်ထား တဲ့ လက်နက်တိုက်ထဲက မဟုတ်ဘဲ ပြင်ပလုပ်ငန်းတွေဆီကနေ ဝယ်ယူခွင့်ပြုထားပါတယ်။ 

အမေရိကန်ကာကွယ်ရေးဝန်ကြီး လွိုက်အော်စတင်ကတော့ ပြီးခဲ့တဲ့နှစ်အတွင်းမှာ အမေရိကန် အနေနဲ့ ဒေါ်လာ ၃၂ ဘီလီယံကျော် တန်ကြေးရှိတဲ့ စစ်ရေးအကူအညီတွေကို ယူကရိန်းအတွက် ပေးအပ်ခဲ့တယ်လို့ အခိုင်အမာပြောကြားခဲ့ပြီး အဲဒီထဲမှာ ဂျဗလင် အမည်ရ တင်ကားပစ် အမြောက်စနစ်ပေါင်း ၈၅၀၀ အပြင် ဒုံးကျည် အမြောက်စနစ် (HIMARS) ၃၈ ခု ပါဝင်တယ်လို့ ဆိုပါတယ်။