အမေရိကန်နဲ့ တောင်ကိုရီးယားနိုင်ငံတို့ဟာ ကြည်းတပ်နဲ့ ရေတပ်အပါအဝင် အကြီးစားစစ်ရေးလေ့ကျင့်မှုတွေကို မတ်လအတွင်းမှာ ၁၀ ရက်ကျော်ကြာ ပြုလုပ်သွားမှာ ဖြစ်တယ်လို့ နှစ်နိုင်ငံတာဝန်ရှိသူတွေက မတ် ၃ ရက်မှာ ပြောပါတယ်။

“Freedom Shield” လို့ အမည်ပေးထားတဲ့ ဒီစစ်ရေးလေ့ကျင့်မှုကို မတ် ၁၃ ရက်ကနေ ၂၃ ရက်အထိ ပြုလုပ်သွားမှာဖြစ်ပြီး ဒါဟာ မဟာမိတ်တွေရဲ့ ပူးပေါင်းခံစစ်အနေအထား ပိုမိုအားကောင်းလာစေဖို့အတွက်ဖြစ်ကြောင်း ဆိုးလ်မြို့က သတင်းစာရှင်းလင်းပွဲတခုမှာ နှစ်ဖက်စစ်တပ်အရာရှိတွေက ပြောသွားပါတယ်။

တောင်ကိုရီးယားနိုင်ငံကဗိုလ်မှူးကြီး လီဆောင်ဂျွန်းက “ဒီပူးတွဲစစ်ရေးလေ့ကျင့်မှုဟာ မြောက်ကိုရီးယားက နျူးကလီးယားနဲ့ ဒုံးကျည်အစီအစဉ်တွေမှာ ပိုမိုရှေ့တိုးလာမှု အပါအဝင် မကြာသေးတဲ့ စစ်ပွဲတွေနဲ့ ပဋိပက္ခဖြစ်ရပ်တွေဆီက ရရှိလာတဲ့ သင်ခန်းစာတွေလိုမျိုး ပြောင်းလဲလာတဲ့ ခြိမ်းခြောက်မှုတွေနဲ့အတူ ဒေသ ပတ်ဝန်းကျင် လုံခြုံရေးအတွက် ဖြစ်နိုင်ခြေရှိတဲ့ စစ်ရေးလေ့ကျင့်မှုအပေါ်မှာ အာရုံစိုက် လုပ်ဆောင်သွားမှာပါ။ ဒါဟာ မဟာမိတ်တွေရဲ့ တုံ့ပြန်နိုင်စွမ်းကို ပိုမိုခိုင်မာလာအောင် အစီအစဉ် ရေးဆွဲထားတာလည်း ဖြစ်ပါတယ်”လို့ ပြောပါတယ်။

အရင်က စစ်ရေးလေ့ကျင့်မှုတွေမှာလည်း မြောက်ကိုရီးယားနိုင်ငံဟာ ဒုံးကျည်ပစ်လွှတ်မှုတွေ အပြင် နျူးကလီးယား ခြိမ်းခြောက်မှုတွေနဲ့အတူ အပြင်းအထန် တုံ့ပြန်ခဲ့ပါတယ်။ ပြုံယမ်းဘက်ကတော့ ဒီလို ပူးတွဲစစ်ဆင်ရေးတွေဟာ ဝါရှင်တန်နဲ့ မဟာမိတ်တွေရဲ့ ရန်လိုမှုကို သက်သေပြနေတာဖြစ်ကြောင်း ပြောဆိုထားပါတယ်။