ထိုင်းနိုင်ငံ၊ ဘန်ကောက်ခရိုင်၊ နယ်မြေပေါင်း ၆၉ ခုမှာ မီးခိုးမြူမှုန်တွေ သတ်မှတ်ထားတဲ့ စံချိန်ထက် ကျော်လွန်ကာ ထူထပ်နေတယ်လို့ ထိုင်းနိုင်ငံလေထုအရည်အသွေး၊ အသံနဲ့ ပတ်ဝန်းကျင်ထိန်းသိမ်းရေး စီမံခန့်ခွဲမှုဌာနက  မတ်လ ၇ ရက် ဒီကနေ့မနက်မှာ ထုတ်ပြန်ပါတယ်။ 

အဆိုပါထုတ်ပြန်ချက်အရ ဒီကနေ့မနက် ၅ နာရီမှ ၇ နာရီအတွင်း PM 2.5 လေထုညစ်ညမ်းမှု တိုင်းထွာရာမှာ ဘန်ကောက်ခရိုင်ခရိုင် ၆၉ နယ်မြေဟာ စံချိန်သတ်မှတ်ထားတဲ့ ၁ ကုဗမီတာလျှင် ၅၀ မိုက်ခရိုဂရမ်ထက် လွန်ကဲနေတာ တွေ့ရှိရတယ်လို့ ဆိုပါတယ်။ 

လေထုအသိပ်သည်းဆုံး နယ်မြေ ၁၀ ခုမှာ ဘင်ကုမ်နယ်မြေ ၉၃ မိုက်ခရိုဂရမ် ၊  ပရဝေ့နယ်မြေ ၈၇ မိုက်ခရိုဂရမ်၊ မင်ဘူရီ ၈၇ မိုက်ခရိုဂရမ် ၊ လတ်ကဘန် ၈၆ မိုက်ခရိုဂရမ် ၊ ခလောင်းဆမ်ဝါး ၈၅ မိုက်ခရိုဂရမ်၊ နောင်ကျောက် ၈၅ မိုက်ခရိုဂရမ် ၊ နောင်ခဲမ် ၈၄ မိုက်ခရိုဂရမ်၊ ဘန်နာယောင်း ၈၂ မိုက်ခရိုဂရမ်၊ ဘန်နား ၈၂ မိုက်ခရိုဂရမ်နဲ့ ယန်နာဝါနယ်မြေ ၈၁ မိုက်ခရိုဂရမ်တို့ဖြစ်တယ်လို့ ဆိုပါတယ်။

ထိုင်းတနိုင်ငံလုံးအနေနဲ့တော့ ခရိုင်ပေါင်း ၄၈ ခုမှာ မီးခိုးမှုန်တွေနဲ့ လေထုညစ်ညမ်းနေကြောင်း၊ အဆိုးရွားဆုံးမှာ မြောက်ပိုင်းဒေသ ၁ စတုရန်းမီတာလျှင် သိပ်သည်းဆ ၆၁ မှ ၁၃၃ မိုက်ခရိုဂရမ်ထိရှိပြီး အရှေ့မြောက်ပိုင်းဒေသတွေမှာ ၄၈ မှ ၇၆ မိုက်ခရိုဂရမ်၊ အလယ်ပိုင်းဒေသမှာ ၄၄ မှ ၈၄ မိုက်ခရိုဂရမ်၊ အရှေ့ပိုင်းဒေသမှာ ၅၂ မှ ၇၃ မိုက်ခရိုဂရမ်ရှိတယ်လို့ ထိုင်းနိုင်ငံ လေထုညစ်ညမ်းမှုထိန်းသိမ်းရေးဗဟိုဌာနက ထုတ်ပြန်ပါတယ်။ 

တောင်ပိုင်းဒေသမှာတော့ အခြေအနေလွန်စွာကောင်းမွန်ကြောင်း သတ်မှတ်စံချိန် ၅၀ မိုက်ခရိုဂရမ်အောက် ၁၇ နဲ့ ၃၂ မိုက်ခရိုဂရမ်ပဲ ရှိတယ်လို့ ဆိုပါတယ်။ 

ဘန်ကောက်နဲ့ အနီးတဝိုက်ဒေသတွေမှာ မတ်လ ၉ ရက်နောက်ပိုင်း တောင်ဘက်အရပ်ကလေ တွေတိုက်ခတ်ဖို့ရှိလို့ လျော့နည်းသွားဖွယ်ရှိကြောင်း ၊ ထိုင်းမြောက်ပိုင်း ၂၇ ခရိုင်မှာတော့ မတ်လ ၈ ရက်မှ ၁၄ ရက်နေ့တွေအတွင်း မြူမှုန်တွေပိုမိုသိပ်သည်းလာဖို့ရှိတယ်လို့ ဆိုပါတယ်။ 

ဒါကြောင့် ပြည်သူတွေအနေနဲ့ မလိုအပ်ဘဲ ကွင်းပြင်ထဲမှာမနေဖို့ ၊ အပြင်ထွက်ရမယ်ဆိုရင် PM 2.5 အကာအကွယ်နှာခေါင်းစည်းတပ်ထားဖို့ လေထုညစ်ညမ်းမှုထိန်းသိမ်းရေးဌာနက သတိပေးပါတယ်။ 

အထူးသဖြင့် သက်ကြီးရွယ်အိုတွေ၊ အသက်ရှူလမ်းကြောင်းဆိုင်ရာရောဂါအခံရှိသူတွေ၊ ကလေးသူငယ်တွေ ဂရုစိုက်ဖို့၊ ချောင်းဆိုးခြင်း၊ လည်ချောင်းယားယံခြင်း၊ အသက်ရှူကြပ်တာတွေ ဖြစ်ပေါ်က နီးစပ်ရာဆေးရုံ ဆေးခန်းမှာ သွားရောက်ပြသဖို့ကိုလည်း အကြံပြုထားပါတယ်။ 

ကိုးကား - springnews