တူကီယဲ(တူရကီ)နိုင်ငံအရှေ့တောင်ပိုင်း ရှန်လူးဖာနဲ့ အာဒီယာမားန် ပြည်နယ်တွေမှာ မိုးသည်းထန်စွာ ရွာသွန်းပြီး ရုတ်တရက် ရေကြီးမှုကြောင့် လူ ၁၀ ဦးထက်မနည်း သေဆုံးခဲ့ကြောင်း နိုင်ငံပိုင် အနာဒိုလူ သတင်းဌာနက မတ် ၁၅ ရက်မှာ ထုတ်ပြန်ပါတယ်။

ပျောက်ဆုံးနေသူတွေနဲ့ အဆောက်အဦတွေထဲမှာ ပိတ်မိနေသူတွေအတွက် ရှာဖွေ ကယ်ဆယ်ရေးလုပ်ဖို့ ရေငုပ်သမားတွေနဲ့ လှေတွေနဲ့အတူ ဆက်လက်လုပ်ဆောင်နေကြောင်း နိုင်ငံရဲ့ ဘေးအန္တရာယ်ဆိုင်ရာ စီမံခန့်ခွဲမှုအာဏာပိုင်အဖွဲ့ (AFAD) က ပြောပါတယ်။

ပြီးခဲ့တဲ့ ၂၄ နာရီအတွင်း မုန်တိုင်းဒဏ်ခံခဲ့ရတဲ့ ပြည်နယ်တွေမှာ ၁ စတုရန်းမီတာကို မိုးရေချိန် ၁၀၀ မီလီမီတာကျော် ရွာချခဲ့ကြောင်းလည်း ဆိုပါတယ်။

လူပေါင်း ၂ ဒသမ ၇ သန်းလောက် နေထိုင်ရာ အဲဒီပြည်နယ်တွေဟာ ပြီးခဲ့တဲ့လကပဲ မြေငလျင်ကြောင့် လူ ၄၈,၀၀၀ ကျော် သေဆုံးခဲ့ပြီး သန်းပေါင်းများစွာ အိုးမဲ့အိမ်မဲ့ ဖြစ်ခဲ့ရတာပါ။

ငလျင်ကြောင့် သူတို့အိမ်တွေ ပျက်စီးသွားခဲ့ရပြီးနောက်မှာ ထောင်နဲ့ချီတဲ့ လူတွေဟာ ယာယီတဲတွေနဲ့ ကွန်တိန်နာအိမ်တွေမှာ ခိုလှုံနေထိုင်ကြတာဖြစ်ပြီး မိုးသည်းထန်စွာ ရွာသွန်းမှုကြောင့် တချို့အိမ်တွေလည်း ရေနစ်မြုပ်ကုန်ပါတယ်။

ရှန်လူးဖာပြည်နယ် အလယ်ပိုင်းမှာ ရေကြီးရေလျှံမှုကြောင့် ကားတွေနဲ့ အပျက်အစီးတွေ မျောပါသွားပြီး တချို့အဆောက်အဦတွေရဲ့ မြေအောက်ထပ်နဲ့ မြေညီထပ်တွေလည်း ရေနစ်မြုပ်ကုန်တဲ့အပြင် ကားလမ်းမတွေဟာ မြစ်ကြောင်းအဖြစ် ပြောင်းကုန်တာကို ဆိုရှယ်မီဒီယာနဲ့ ပြည်တွင်းရုပ်သံလွှင့်ဌာနတွေက ဗီဒီယိုတွေမှာ တွေ့မြင်ရပါတယ်။

အာဒီယာမားန် ပြည်နယ်မှာတော့ ငလျင်ဒဏ်သင့်သူ ၃ ဦး ခိုလှုံနေတဲ့ ကွန်တိန်နာတလုံးဟာ ရေကြီးမှုနဲ့အတူ မျောပါသွားပြီး သူတို့ကို ရှာဖွေ‌ရေးတွေ ဆက်လုပ်နေကြောင်း ပြည်နယ်အုပ်ချုပ်ရေးမှူးက CNN Turk သတင်းဌာနကို ပြောပါတယ်။