ထိုင်းနိုင်ငံ၊ ဘန်ကောက်မြို့ ဈေးဝယ်စင်တာတခုရဲ့ ၇ ထပ်မှာ ဖွင့်လှစ်ထားတဲ့ “Pata Zoo”  ပုဂ္ဂလိက တိရစ္ဆာန်ရုံရဲ့ လှောင်အိမ်ထဲမှာ နှစ်ပေါင်း ၃၀ ကြာအောင် တကောင်တည်း ပိတ်လှောင်ခံနေရတဲ့   ဂေါ်ရီလာ လူဝံအမတကောင်ကို ပြန်လွှတ်ပေးဖို့ တိရစ္ဆာန်အခွင့်အရေးလှုပ်ရှားသူတွေက တောင်းဆိုပါတယ်။ 

Bua Noi ခေါ်လို့ နာမည်ပေးထားတဲ့ ဂေါ်ရီလာကို ပိုင်ဆိုင်တဲ့ မိသားစုကတော့ မျိုးသုဉ်းလုနီးပါး အန္တရာယ်ရှိတဲ့ တိရစ္ဆာန်ကို လွှတ်ပေးဖို့ လူထုနဲ့ အစိုးရရဲ့ ဖိအားတွေကို ဆန့်ကျင်ပြီး လှောင်အိမ်ထဲမှာပဲ ဆက်လက်ထားရှိပါတယ်။

ဈေးဝယ်စင်တာရဲ့နံရံမှာ ‘Free Bua Noi!’ လို့ ဂရဗစ်တီ ပန်းချီရေးဆွဲခဲ့တဲ့သူကို ဖမ်းမိဖို့ သတင်းအချက်အလက်ပေးသူကို တိရစ္ဆာန်ရုံဘက်က ဆုငွေ ဘတ် ၁ သိန်း (ဒေါ်လာ ၂,၈၀၀) ထုတ်ခဲ့တဲ့အတွက်  ဒီဖြစ်ရပ်ဟာ သတင်းခေါင်းစဉ်အနေနဲ့ ထပ်မံထွက်ပေါ်လာခဲ့ပါတယ်။

အရှေ့ပိုင်း ဂေါ်ရီလာတွေရဲ့ ပျမ်းမျှအသက်ဟာ အနှစ် ၄၀ ကျော်ရှိပြီး Bua Noi ဟာ ၁၉၉၂ ခုနှစ်မှာ ဂျာမနီနိုင်ငံက ခေါ်ယူလာချိန် အသက် ၃ နှစ်ရှိပြီဖြစ်ပါတယ်။

“သူအဲ့ဒီထဲက ထွက်ဖို့လိုတယ်။ သူက နေ၊ လကို မမြင်ရဘူး။ မှန်ပြတင်းပေါက်နဲ့ အင်္ဂတေပုံးထဲမှာ နေထိုင်နေရတာ” လို့ ထိုင်းနိုင်ငံက သားရိုင်းတိရစ္ဆာန်မိတ်ဆွေများဖောင်ဒေးရှင်းက အက်ဒ်ဝင်ဝိခ်က AFP ကို ပြောပါတယ်။

မျိုးသား တောရိုင်းတိရစ္ဆာန် ထိန်းသိမ်းရေးရုံးက ဒါရိုက်တာက “တောရိုင်းတိရစ္ဆာန်တွေ ထိန်းသိမ်းရေးနဲ့ အကာကွယ်ပေးရေး ဥပဒေပုဒ်မကို တိရစ္ဆာန်ရုံက မပြဋ္ဌာန်းသေးတာကြောင့် Pata က ဆက်ဖွင့်နေနိုင်တာ” လို့ ပြောပါတယ်။

ကိုဗစ်-၁၉ ကပ်‌ရောဂါဖြစ်ပွားပြီးတဲ့နောက် ခရီးသွားတွေကို ပြန်လည်ကြိုဆိုတဲ့အနေနဲ့ ထိုင်းနိုင်ငံရဲ့ တောရိုင်းတိရစ္ဆာန်အများအပြားကို ဆွဲဆောင်မှုနဲ့ ဝင်ရောက်ရလွယ်ကူမှုတို့ဟာ စိတ်ပျက်စရာ ဖြစ်လာပါတယ်။

အာဏာပိုင်တွေကတော့ ဇာတိဖွား တိရစ္ဆာန်တွေကို အလွဲသုံးစားပြုလုပ်တာကို တားဆီးဖို့ ပတ်ဝန်းကျင်ဆိုင်ရာ ဥပဒေအသစ်ကို အတည်ပြုပြီးပေမဲ့ အဲ့ဒီဥပဒေဟာ ဌာနေတိုင်းရင်းသားမဟုတ်တဲ့ ပုဂ္ဂလိကပိုင် တိရစ္ဆာန်တွေ အကျုံးဝင်မှာ မဟုတ်ပါဘူး။

Bua Noi ကို လွှတ်ပေးဖို့ နိုင်ငံတကာဖိအားတွေ များလာတဲ့အတွက် ထိုင်းနိုင်ငံ သဘာဝ သယံဇာတနဲ့ သဘာဝပတ်ဝန်းကျင် ထိန်းသိမ်းရေး ဝန်ကြီးဌာနက ဘတ်ငွေ သန်း ၃၀ (ဒေါ်လာ ၈၈၀,၀၀၀) နဲ့ ကမ်းလှမ်းခဲ့ပေမဲ့ ဂေါ်ရီလာက နေရပ်ပြန်ဖို့ အရမ်းအသက်ကြီးနေပြီဆိုပြီး မိသားစုပိုင် တိရစ္ဆာန်ရုံက ငြင်းပယ်ခဲ့ပါတယ်။

Source / video - AFP