ပြင်သစ်နိုင်ငံ အနောက်တောင်ပိုင်းရှိ ဘော်ဒိုးမြို့မှာ အစိုးရရဲ့ အငြိမ်းစားယူခွင့်သက်တမ်း တိုးမြှင့်မယ့် အစီအစဉ်အပေါ် ဆန့်ကျင်ဆန္ဒပြတဲ့အနေနဲ့ မတ်လ ၂၃ ရက်မှာ ဆန္ဒပြသူတွေက မြို့တော်ခန်းမကို မီးရှို့ခဲ့ပါတယ်။

မြို့တော်ပဲရစ် အပါအဝင် နိုင်ငံတဝန်းက ဆန့်ကျင်ဆန္ဒပြမှုတွေကြောင့် အခြေအနေ ပြင်းထန်နေပြီး ဒေသစံတော်ချိန် ည ၈ နာရီဝန်းကျင်လောက်မှာ ဘော်ဒိုးမြို့တော်ခန်းမ အဆောက်အဦရဲ့ ပင်မတံခါးကြီး မီးလောင်ကျွမ်းနေတာကို မျက်မြင်သက်သေတဦးရဲ့ ဗီဒီယိုမှတ်တမ်းထဲမှာ တွေ့ရပါတယ်။

မီးသတ်သမားတွေက ဒီမီးလောင်ကျွမ်းမှုကို အလျင်အမြန် ငြှိမ်းသတ်နိုင်ခဲ့ပေမဲ့ ရဲတပ်ဖွဲ့အာဏာပိုင်တွေကတော့ အကြောင်းရင်းဇာစ်မြစ်ကို အဆုံးအဖြတ် မပေးနိုင်သေးဘူးလို့ ဆိုပြီး ပင်မတံခါးဟာလည်း အနည်းငယ်သာ ပျက်စီးသွားပါတယ်။

ပြင်သစ်နိုင်ငံမှာ တရားဝင် အငြိမ်းစားယူရမယ့် အသက်ကို ၆၄ နှစ်အထိ ၂ နှစ်တိုးမြှင့်မယ့် ဥပဒေပြဋ္ဌာန်းဖို့ အစိုးရက ဖိအားပေးခဲ့ပြီး ရက်ပိုင်းအကြာမှာ နိုင်ငံတဝန်း ဆန္ဒပြမှုတွေကြောင့် ရထားနဲ့ လေကြောင်းခရီးစဉ်တွေ ပြတ်တောက်နေခဲ့သလို ဆရာ၊ ဆရာမတွေ အပါအဝင် တခြားဝန်ထမ်းတွေလည်း အလုပ်ကနေ နုတ်ထွက်လာခဲ့ကြပါတယ်။

နိုင်ငံတဝန်း ဆန့်ကျင်ဆန္ဒပြမှုတွေဟာ ၉ ရက်မြောက်အထိ ရောက်ရှိလာပြီဖြစ်ပြီး ဒီဆန္ဒပြမှုတွေအတွင်း ရဲအရာရှိ ၁၂၃ ဦး ထိခိုက်ဒဏ်ရာရရှိခဲ့တဲ့အပြင် နိုင်ငံတဝန်းမှာ လူဦးရေ ၈၀ လောက်ကို ဖမ်းဆီးထိန်းသိမ်းခဲ့တယ်လို့လည်း ပြည်ထဲရေးဝန်ကြီး ဂျဟယ် ဒါမန်နန်က သတင်းထုတ်ပြန်ပါတယ်။

ပင်စင်သက်တမ်း ကန့်သတ်ချက်အပေါ်မှာ ပြည်သူလူထုရဲ့ ဒေါသတကြီး တုံ့ပြန်မှုကို အစိုးရအနေနဲ့ အလေးမထားဘူးဆိုရင် ဒီလိုဆန္ဒပြပွဲတွေ ပိုမိုပြင်းထန်လာမှာကို အလုပ်သမားသမဂ္ဂတွေက စိုးရိမ်နေကြတာပါ။

လာမယ့် မတ်လ ၂၈ ရက်နေ့မှာ ဗြိတိန်ဘုရင် ချားလ်စ်ဟာ ပဲရစ်မြို့ကနေ ဘော်ဒိုးမြို့ကို  ရထားနဲ့ လာရောက်ဖို့ရှိတာကြောင့် အဲဒီနေ့မှာ နိုင်ငံလုံးဆိုင်ရာ သပိတ်မှောက် ဆန္ဒပြမှုအသစ်တွေ လုပ်ဆောင်ဖို့အပြင် သီတင်းပတ်ကုန်ကာလတွေမှာလည်း ဒေသအလိုက် လှုပ်ရှားမှုတွေ လုပ်ဆောင်ကြဖို့ သမဂ္ဂတွေဘက်က တောင်းဆိုခဲ့ပါတယ်။