ဘိုင်ယန်မြူးနစ်အသင်းရဲ့ ကမ်းလှမ်းချက်ရရှိချိန်မှာ အံ့အားသင့်ခဲ့ရကြောင်း နည်းပြသစ် တူချယ် က ပြောပါတယ်။

ဘိုင်ယန်အသင်းဟာ နည်းပြ နာဂယ်စ်မန်းကို ထုတ်ပယ်ပြီး ဒေါ့မွန်နည်းပြဟောင်း တူချယ်ကို အစားထိုးခန့်အပ်ခဲ့တာပါ။ 

ဘိုင်ယန်မြူးနစ်အသင်းဆီရောက်ဖို့ ပြီးခဲ့တဲ့နှစ်တွေအတွင်းမှာ နီးစပ်ခဲ့ဖူးပေမဲ့ ဒီလိုအချိန်မှာတော့ ဘိုင်ယန်နည်းပြဖြစ်လာမယ်လို့ မမျှော်လင့်ခဲ့ကြောင်း၊ ကမ်းလှမ်းချက်ရရှိချိန်မှာ အံ့အားသင့်မိ ခဲ့ကြောင်းအသင်းနဲ့ ပထမဆုံးမိတ်ဆက်ပွဲမှာ နည်းပြသစ်တူချယ်က ပြောပါတယ်။

နည်းပြဘဝကို တခြားနိုင်ငံတွေမှာပဲ ဆက်လက်ပြီးကျင်လည် ရလိမ့်မယ်လို့ ထင်ခဲ့ကြောင်းနဲ့ ဘိုင်ယန်အသင်းရဲ့ ကမ်းလှမ်းမှုခံရတာဟာ ဂုဏ်ယူစရာ ဖြစ်ကြောင်း တူချယ်ကပြောပါတယ်။

အသက် ၄၉ နှစ်ရှိ ဂျာမန်နည်းပြတူချယ်ဟာ မိန့်ဇ်အသင်းနဲ့ နည်းပြဘဝစတင်ခဲ့ပြီး ဒေါ့မွန်၊ ပီအက်စ်ဂျီနဲ့ ချဲလ်ဆီးအသင်းတွေကို တာဝန်ယူကိုင်တွယ်ခဲ့ဖူးပါတယ်။