ဥရောပစီးပွားရေးဇုန်ထဲက ဘဏ်တွေမှာ အပ်နှံငွေပြန်လည်ထုတ်ယူမှုဟာ ဖေဖော်ဝါရီလအတွင်း စံချိန်တင်အတိုင်းအတာအထိ ရောက်ရှိလာခဲ့တယ်လို့ မတ် ၂၇ ရက်က ထုတ်ပြန်လိုက်တဲ့ တရားဝင် အချက်အလက်တွေအရ သိရပါတယ်။ 

ဥရောပဇုန်မှာ ငွေအပ်နှံထားသူတွေဟာ ဖေဖော်ဝါရီလအထိ လွန်ခဲ့တဲ့ ၅ လတာအတွင်း ယူရိုငွေ ၂၁၄ ဘီလီယံအထိ ပြန်ထုတ်ယူခဲ့တာဖြစ်ကြောင်း ဥရောပဗဟိုဘဏ် (ECB)က ထုတ်ပြန်ခဲ့တဲ့ အချက်အလက်ထဲမှာ ဖော်ပြထားပါတယ်။ 

ပြီးခဲ့တဲ့ ဖေဖော်ဝါရီလအတွင်း ဥရောပဇုန်ထဲက ဘဏ်တွေမှာ အပ်နှံငွေယူရို ၇၁ ဒသမ ၄ ဘီလီယံအထိ ကျဆင်းသွားခဲ့ပြီး အိမ်ထောင်စုအပ်နှံငွေမှာလည်း ၂၀ ဒသမ ၆ ဘီလီယံအထိ လျော့နည်းသွားတာကြောင့် အဆိုးရွားဆုံး စံချိန်တင်ကျဆင်းမှုဖြစ်တယ်လို့ အချက်အလက်တွေ က ပြသနေပါတယ်။ 

Silicon Valley ဘဏ်ပြိုလဲမှုနဲ့ Credit Suisse ကုမ္ပဏီဆိုင်ရာ အကျပ်အတည်းကြောင့် တစ်ကမ္ဘာလုံးရှိ ဘဏ်လုပ်ငန်းစနစ်အပေါ်မှာ စိုးရိမ်ပူပန်မှု မြင့်တက်လာစေခဲ့ပါတယ်။ 

ဂျာမနီနိုင်ငံက ဘဏ်တွေမှာဆိုရင်လည်း ငွေစုသူတွေအနေနဲ့ ငွေအပ်နှံမှုပြုလုပ်လာအောင် အမြင့်ဆုံးအတိုးနှုန်းထားကို ၁ ဒသမ ၆ ရာခိုင်နှုန်းသာ သတ်မှတ်ထားတယ်လို့ အပ်ငွေဆိုင်ရာ ပွဲစားလုပ်ငန်းတစ်ခုဖြစ်တဲ့ ရေဆင် (Raisin)က ပြောပါတယ်။ 

ဒီလိုအတိုးနှုန်းနည်းပါးမှုကြောင့် ငွေစုထားသူတွေဟာ သူတို့ရဲ့ ပိုက်ဆံတွေကို အကျိုးအမြတ် များနိုင်တဲ့ ငွေကြေးရန်ပုံငွေတွေနဲ့ ဘဏ်ငွေချေးစာချုပ်တွေအဖြစ် ပြောင်းလဲကာ ရင်းနှီးမြှုပ်နှံ လာကြတာ ဖြစ်ပါတယ်။ 

ပမာဏကြီးမားတဲ့ အပ်ငွေပြန်လည်ထုတ်ယူမှုနဲ့ ဘဏ်လုပ်ငန်းဆိုင်ရာ ပြသာနာတွေ ကျယ်ပြန့်လာ တာကြောင့် လာမယ့်ရက်တွေအတွင်း ဥရောပဘဏ္ဍာရေးဆိုင်ရာ အဖွဲ့အစည်းတွေအပေါ်မှာ ဖိအားပိုမို များပြားလာလိမ့်မယ်လို့လည်း သိရပါတယ်။