ကရင်ပြည်နယ်၊ မြဝတီမြို့နယ်မှာ တိုက်ပွဲပြင်းထန်နေတာကြောင့်  မြန်မာ-ထိုင်းနယ်စပ် သောင်ရင်းမြစ်ကို ဖြတ်ကျော်ပြီး ထိုင်းနိုင်ငံဘက်ကို စစ်ဘေးရှောင်ထွက်ပြေးလာသူ ၅၀၀၀ လောက်ရှိတယ်လို့  မြဝတီဒေသခံတွေက ပြောပါတယ်။

မြဝတီမြို့နယ်မှာ စစ်ကောင်စီတပ်၊ BGF ပူးပေါင်းတပ်တွေနဲ့ ကရင်အမျိုးသားလွတ်မြောက်ရေးတပ်မတော် (KNLA) ၊ PDF ပူးပေါင်းတပ်တွေအကြား တိုက်ပွဲဖြစ်ပွားနေတာ သီတင်းတပတ်ကျော်ရှိလာနေပြီး ဒီကနေ့လည်း တိုက်ပွဲတွေ ပြင်းထန် ဆက်လက်ဖြစ်ပွားနေတာပါ။ 

တိုက်ပွဲမှာ KNLA တပ်ဖွဲ့ဝင် ၆ ဦးထိခိုက်ဒဏ်ရာရရှီပြီး BGF နယ်ခြားစောင့်တပ်ဘက်က ၁၀ ယောက်ထက်မနည်း  သေဆုံးဒဏ်ရာရရှိသွားတယ်လို့ ကရင်လက်နက်ကိုင်အဖွဲ့နဲ့ နီးစပ်သူက ပြောပါတယ်။

တိုက်ပွဲကြောင့် ကျေးရွာပေါင်း ၂၀ လောက်က ရွာသား ၅၀၀၀ လောက် မြန်မာထိုင်းနယ်စပ် သောင်ရင်းမြစ်ကိုဖြတ်ကူးပြီး ထိုင်းနိုင်ငံဘက် ဘေးကင်းရာနေရာမှာ စစ်ပြေးရှောင်နေရတယ်လို့ နယ်စပ်တာဝန်ရှိသူတစ်ဦးက ပြောပါတယ်။

မြဝတီမြို့နယ်အတွင်း တိုက်ပွဲတွေ နယ်စပ်ကုန်သွယ်ရေး အဓိကလမ်းကြောဖြစ်တဲ့ မြဝတီ- ကော့ကရိတ် အာရှလမ်းမကြီးလည်း ပိတ်ထားခဲ့ရပြီး နှစ်နိုင်ငံ ကုန်သည်တွေလည်း ကုန်စည်သယ်ယူပို့ဆောင်ဖို့ ခက်ခဲသွားသလို တန်ဖိုးကြီးကုန်စည်တွေ သိုလှောင်စရိတ်တွေ မြင့်တက်လို့ အခက်အခဲနဲ့ ကြုံနေရပါတယ်။

မြန်မာနိုင်ငံကို ထိုင်းနိုင်ငံမှဝင်ရောက်လာတဲ့ သကြား၊ ဆီ၊ စိုက်ပျိုးရေး၊ ဓာတုကုန်ကြမ်း၊ အီလက်ထရွန်းနစ်ပစ္စည်း အစရှိတဲ့ ကုန်စည်တွေလည်း လမ်းပိတ်ဆို့နေပြီး ထိုင်းနိုင်ငံ ကုန်လှောင်ရုံတွေမှာ အခငွေ ဈေးကြီးကြီးပေးပြီး ထားနေရတယ်လို့ ကုန်သည်တဦးက ပြောပါတယ်။

“မြဝတီ၊ သင်္ဃန်းညီနောင်၊ ကော့ကရိတ်နဲ့ ကျုံဒုံးတိုက်ပွဲတွေဖြစ်နေပြီး ကုန်သွယ်မှုလမ်းဖြစ်တဲ့ အာရှလမ်းမကြီး ပိတ်လိုက်ဖွင့် လိုက်လုပ်နေတော့ ကုန်စည်တွေ သိုလှောင်ရေးမှာအခက်ခဲရှိသလို ပျက်စီးဆုံးရှုံးမှုကိုလည်း ရင်ဆိုင်နေေရပါတယ်။”

တိုက်ပွဲတွေ ဖြစ်ပွားနေတာကြောင့် မြဝတီမြို့ခံတွေကလည်း စိုးရိမ်နေကြပြီး မြို့တွင်း ခိုးဆိုးလုယက်သူတွေ ပိုပြီးများလာနေတယ်လို့ မြဝတီမြို့ခံ ကုန်သည်တစ်ဦးကဆိုပါတယ်။

ကော့ကရိတ်တိုက်ပွဲကြောင့်  အာရှလမ်းကုန်စည်စီးဆင်းမှု အားနည်းသွားပြီး  မြန်မာပြည်တွင်းမှာ ထိုင်းနိုင်ငံထွက်ကုန် ဈေးနှုန်းတွေ မြင့်တက်လာနိုင်တယ်လို့ မြန်မာ-ထိုင်းနယ်စပ် စီးပွားရေးသမားတဦးက ပြောပါတယ်။