ထိုင်းနိုင်ငံမှာ ကောလ်စင်တာအွန်လိုင်းငွေလိမ်မှုတွေ နေ့စဉ်လိုဖြစ်ပျက်နေပြီး ပျှမ်းမျှအားဖြင့် တစ်နေ့ကို လူပေါင်း ၅၀၀ ကျော်အလိမ်ခံရကာ ဆုံးရှုံးငွေမှာလည်း တစ်နေ့ ဘတ် ၅ သန်း ကျော်ရှိတယ်လို့  ချနယ်လ် ၃ ထိုင်းတီဗွီသတင်းမှာ ဖော်ပြပါတယ်။

အရင်က ရဲတပ်ဖွဲ့အယောင်ဆောင်၊ ဘဏ်ဝန်ထမ်းအယောင်ဆောင်၊ စာတိုက်ဝန်ထမ်းယောင် ဆောင်ငွေလိမ်နေရာက အခုခါမှာ နာမည်ကြီး ကုမ္ပဏီအယောင်ဆောင်ပြီး ပုံစံအသစ်နဲ့ ရင်းနှီးမြှုပ်နှံ၊ အစုရှယ်ယာငွေတွေလိမ်ယူနေတယ်လို့ ဆိုပါတယ်။ 

ပြီးခဲ့တဲ့အပတ်က ကျောင်းပြီးကာစ မိန်းကလေးတစ်ဦးဟာ အလုပ်အကိုင်ရှာဖွေနေစဉ် အွန်လိုင်း ကနေ လူသုံးကုန်ပစ္စည်းအမျိုးမျိုးရောင်းဝယ်တဲ့ ဂရုပ်ဖ်တစ်ခုနဲ့ချိတ်ဆက်မိကြောင်း၊ အဆိုပါ အဖွဲ့ဟာ ထိုင်းက Shopee ဆိုတဲ့ နာမည်ကြီးအွန်လိုင်းရောင်းဝယ်မှုကုမ္ပဏီအမည်ကို အသုံးပြုပြီး LINE ကနေ ရင်းနှီးမြှုပ်နှံသူတွေဖိတ်ခေါ်ခဲ့တယ်လို့ ဆိုပါတယ်။ 

အဆိုပါ LINE ထဲမှာ အဖွဲ့ဝင် ၂၀၀ ကျော်ရှိပြီး သူတို့လည်း အွန်လိုင်းရောင်းဝယ်မှုကနေ အမြတ် ငွေရတာတွေ့လို့ သူလည်းအဖွဲ့ဝင်ခဲ့ကြောင်း၊ ငွေအနည်းငယ်ရင်းနှီးစမှာ အမြတ်ငွေပုံ မှန်ရပြီး ဘတ်သိန်းနဲ့ချီရင်းနှီးတဲ့ ဗွီအိုင်ပီအဖွဲ့ထဲဝင်လိုက်တဲ့အခါမှာတော့အမြတ်ငွေတွေပုံမှန်မရတော့ဘဲ  ငွေသွင်းရတဲ့ဘဏ်နံပါတ်ဟာ တပါးသူအမည်နဲ့ ငှါးရမ်းတဲ့နံပါတ်တွေဖြစ်နေလို့ မသင်္ကာတာနဲ့ အရင်းတွေ ပြန်ထုတ်ယူခဲ့ကြောင်း၊ ဒါပေမဲ့ အလွယ်တကူပြန်ထုတ်မရဘဲ ဘတ် ၃ သိန်းတကြိမ်၊ ၅ သိန်းတကြိမ်လွှဲပေးကာမှ သူ့ရဲ့အစုရှယ်ယာ ဘတ် ၁ သန်းကျော်ပြန်ရတယ်လို့  သတင်းဌာန အင် တာဗျူးမှာ ပြောသွားပါတယ်။ 

အဆိုပါငွေလွှဲပေးလိုက်တဲ့ ဘဏ်စာရင်းကို ပိတ်ပေးဖို့ဘဏ်မှာသွားပြောပေမဲ့ ဘဏ်က ချက်ချင်း မပိတ်ပေးဘဲ ဗဟိုထိအကြောင်းကြားရမယ်လို့ ပြောကြောင်း ၊ ဗဟိုကို ဆက်သွယ်ရာမှာ ရဲတပ်ဖွဲ့က ညွှန်ကြားမှပိတ်လို့ရမယ်ပြောပြီး ၆ နာရီကြာမှ အဆိုပါစာရင်းကိုပိတ်ပေးကြောင်း၊ အဲဒီ ကြားထဲမှာလည်း တခြားသူတွေဆီက ငွေတွေထပ်ဝင်လာသေးတယ်လို့ ဆိုပါတယ်။ 

ဒီကိစ္စနဲ့ ပတ်သက်ပြီး ထိုင်းအမျိုးသားရဲတပ်ဖွဲ့ ရဲချုပ် ဒမ်းရုန်းဆဒ် ကစ်သီပဖတ်က “ကောလ်စင် တာတွေဟာ နည်းလမ်းအမျိုးမျိုးရှာကြံပြီးလိမ်လည်နေတယ်၊ ပြဿနာက လိမ်လည်ဂိုဏ်းဟာ ထိုင်းမှာမဟုတ်ဘဲ မြန်မာ၊ ကမ္ဘောဒီးယားစတဲ့အိမ်နီးချင်းနိုင်ငံတွေကနေ လိမ်တာဖြစ်တယ်။ မြန်မာဆိုရင် မဲဆောက်တဘက်ကမ်းနဲ့  မယ်ဆိုင်တဘက်ကမ်းတွေမှာရှိတယ်။ တဘက်နိုင်ငံမှာ ဆို တော့ ပြဿနာရဲ့ အရင်းမြစ်ကိုမဖြေရှင်းနိုင်ဘဲ ထိုင်းရဲတပ်ဖွဲ့အနေနဲ့က လိမ်လည်တဲ့ဘဏ်စာရင်း တွေ ပိတ်ပစ်တာ၊ အမည်ခံဘဏ်စာရင်းဖွင့်ပေးသူကို ဖမ်းဆီးအရေးယူတာ၊ ဘဏ်စာရင်းလိုက်ငှါး သူတွေကို အရေးယူတာစတဲ့ အကိုင်းအလက်တွေကိုဘဲ ဖြတ်တောက်နှိမ်နင်းနိုင်တယ်။ ထိုင်းကနေ တဘက်နိုင်ငံထဲဝင်ပြီး ကောလ်စင်တာသွားလုပ်နေတယ်လို့ သတင်းရထားသူ အယောက် ၁၀၀ ကျော်ကို ဖမ်းဝရမ်းထုတ်ထားတယ်။ အဲဒီစာရင်းတွေ အိမ်နီးချင်းနိုင်ငံ အာဏာပိုင်ဆီပို့ထားပြီး ဖမ်းဆီးပေးဖို့ပြောထားတာလည်း မဖမ်းနိုင်သေးဘူး”လို့  သတင်းထောက်တွေကို ပြောပါတယ်။

ထိုင်းဥပဒေအရ ဘယ်သူမဆို မိမိအမည်နဲ့ ဘဏ်စာရင်းဖွင့်ပြီး တပါးသူ ( လိမ်လည်ဂိုဏ်း ) အား အသုံးပြုစေတယ်ဆိုရင် ထောင်ဒဏ် ၃ နှစ်ထက်မပို ငွေဒဏ် ဘတ် ၃ သိန်းထက်မပို ဒါမှမဟုတ် ထောင်ဒဏ်ရောငွေဒဏ်ပါ ၂ ရပ်လုံးကျခံရမှာ ဖြစ်ပါတယ်။ 

တပါးသူရဲ့ ဘဏ်စာရင်း အမည်နံပါတ်ကို လိုက်လံ ဝယ်ယူတာ၊ ငှါးရမ်းတာ၊ ရောင်းချတာတွေပြုပါက ထောင်ဒဏ်အနည်းဆုံး ၂ နှစ်မှ ၅ နှစ်ထိလည်းကောင်း၊ ငွေဒဏ် ဘတ် ၂ သိန်းမှ ၅ သိန်းထိလည်းကောင်း၊ ဒါမှမဟုတ် ထောင်ဒဏ်ရောငွေဒဏ်ပါ နှစ်ရပ်လုံး ကျခံရမှာ ဖြစ်ပါတယ်။ 

ထိုင်းနိုင်ငံမှာ ဧပြီ ၆ ရက်က အွန်လိုင်းအလိမ်ခံလို့ တိုင်ကြားလာတဲ့အမှုပေါင်း ၆၁၀ ရှိပြီး ဘဏ်စာအုပ် ၂၃၇ အုပ်ပိတ်ပစ်ခဲ့ရကြောင်း၊ အလိမ်ခံရလို့ ဆုံးရှုံးငွေ ၈၉၇၅၀၁၉ ဘတ်ရှိတယ်လို့ ဆိုပါတယ်။ 

ပြီးခဲ့တဲ့ မတ်လ ၁ ရက်ကနေ ၃၁ ရက်အထိ အွန်လိုင်းကနေလိမ်လည်မှုအကြိမ်ပေါင်း ၂၂၉၉၂၃ ကြိမ်ရှိပြီး အမည်ခံငွေစာရင်းစာအုပ်ပေါင်း ၅၅၇၇၆ ကိုစာရင်းပိတ်ခဲ့ကာ ဆုံးရှုံးငွေပေါင်း ၃၄၅၁၀၈ ၃၅၂၃၂ ဘတ် ( သန်းပေါင်း ၃၄၀၀၀ ကျော် ) တယ်လို့ ရဲတပ်ဖွဲ့က ပြောပါတယ်။ 

အဆိုပါငွေတွေကို နိုင်ငံခြားငွေအဖြစ်လဲလှယ်ပြီး တရုတ်မာဖီးယားတွေထံပို့ပေးရတယ်လို့  ချနယ်လ် ၃ သတင်းမှာ ဖော်ပြသွားပါတယ်။