ရခိုင်ပြည်နယ်မှာ ရက္ခိုင့်တပ်တော်(အေအေ)က ဦးဆောင်ကျင်းပတဲ့ ဇီးချောင်းသင်္ကြန်အပြီးမှာ မြောက်ဦးမြို့နယ် လေးမြို့နဲ့ ရသေ့တောင်မြို့နယ် ကြိမ်သာရွာ ၂ နေရာမှာ ဧပြီ ၁၈ ကနေ ၂၀ ရက်အထိ ရခိုင်ရိုးရာသင်္ကြန်ကို ဆက်လက်ကျင်းပနေပါတယ်။

မြောက်ဦးမြို့နယ် လေးမြို့မြစ် အောက်လေညှင်းတောင်နားက ရေလယ်ကျွန်းမှာ စည်ကားစွာ ဆက်လက်ကျင်းပနေတာဖြစ်ပါတယ်။

လေးမြို့ဒေသခံတစ်ဦးက “ပုံမှန်ဆို လေးမြို့သင်္ကြန်က မောင်တောသင်္ကြန်လိုပဲ နှစ်ဆန်း ၁ ရက်နေ့မှာ ကျင်းပတယ်။ ဒီနှစ်က ဇီးချောင်းသင်္ကြန်နဲ့ ခွာလိုက်တာမို့ ပွဲစီစဥ်သူတွေက နှစ်ဆန်း ၂ ရက်နေ့မှာ စတာဖြစ်မယ်။ ဒီနှစ်တော့ ကြိမ်သာရွာနဲ့ လေးမြို့သင်္ကြန်က ရက်တူတယ်”လို့ ပြောပါတယ်။

ကြိမ်သာရွာကတော့ ဒီနှစ်မှ ရခိုင်သင်္ကြန်ပွဲစလုပ်တယ်လို့လည်း ဆိုပါတယ်။ ဗြုတ်ချောင်းရွာနဲ့ အထက်လေညှင်းတောင် ရေလယ်ကျွန်းမှာတော့ ရေမျှောစားသောက်ဆိုင် ပြုလုပ်ထားတယ်လို့လည်း သိရပါတယ်။

ရခိုင်ရိုးရာသင်္ကြန်ပွဲတော်မှာ  နံ့သာသွေး။ ဘုရားရေသပ္ပါယ်၊ ရေလောင်းပွဲနဲ့ သက်ကြီးပူဇော်ပွဲကို သင်္ကြန်ကြိုရက်ကနေ နှစ်ဆန်း ၁ရက်ထိ အစဥ်လိုက်ကျင်းပကြတာပါ။

မောင်တောနဲ့ လေးမြို့မြို့မှာတော့ သင်္ကြန် ၃ ရက်မှာ နံ့သာသွေး၊  ဘုရားရေသပ္ပါယ်၊ အိမ်ဆေး ဥပုသ်စောင့်ကုသိုလ်ယူကြပြီး နှစ်ဆန်း ၁ ရက်နေ့မှ ရေလောင်းပွဲကိုစကြတာလို့လည်း ဒေသခံတွေကပြောပါတယ်။

မောင်တောရခိုင်ရိုးရာသင်္ကြန်ကတော့ပုံမှန် နှစ်ဆန်း ၁ ရက်နေ့မှာစတင်ပြီး လေးမြို့က ဒီနှစ်မှာ ၁ ရက်နောက်ကျတာ ဖြစ်ပါတယ်။