ကင်ညာနိုင်ငံတွင် အစာအငတ်ခံ သေဆုံးခဲ့သည့် ရုပ်အလောင်းများ တွေ့ရှိ

ကင်ညာရဲတပ်ဖွဲ့ဟာ နိုင်ငံရဲ့အရှေ့ဘက်မှာ သံသယဖြစ်စရာ သင်္ချိုင်းတဒါဇင်ကျော်မှ ရုပ်အလောင်းတွေကို ဧပြီ ၂၁ ရက်က စတင်တူးဖော်ခဲ့ကြပြီး အဲဒီအလောင်းတွေထဲမှာ အစာရေစာ အငတ်ခံပြီး သေဆုံးသွားရင် ကောင်းကင်ဘုံကို ရောက်မယ်ဆိုတဲ့ အယူဝါဒကို ယုံကြည်သူတွေ ပါဝင်နေတယ်လို့ ဆိုပါတယ်။
ကီလီဖှီ ခရိုင်ရှိ ရှာခါဟိုလာ သစ်တောထဲမှာ တုတ်ချောင်းတွေ စိုက်၊ အဝါရောင်တိပ်တွေကာပြီး ဖုံးဖိမြှုပ်နှံထားတဲ့အလောင်းတွေကို တွေ့ရှိခဲ့တာပါ။
အဲဒီနေရာဟာ ပြီးခဲ့တဲ့သီတင်းပတ်က ဂွဒ်နယူးစ် နိုင်ငံတကာ အသင်းတော်ရဲ့ အဖွဲ့ဝင် ၁၅ ဦးကို ရဲတပ်ဖွဲ့က ကယ်တင်ခဲ့တဲ့ နေရာအနီးမှာဖြစ်ကြောင်း Citizen TV မှထုတ်လွှင့်တဲ့ ဗွီဒီယိုဖိုင်အရ သိရပါတယ်။
ကယ်ဆယ်ထားတဲ့ ဝတ်ပြုကိုးကွယ်သူ ၁၅ ဦးကို သူတို့ရဲ့ဖန်တီးရှင်နဲ့ တွေ့ဆုံနိုင်စေဖို့ သူတို့ ကိုယ်တိုင် အစာငတ်ခံ သေဆုံးကြဖို့ အမိန့်ပေးထားကြောင်း ရဲတပ်ဖွဲ့က ပြောကြားခဲ့ပါတယ်။ သူတို့ထဲက ၄ ဦးကတော့ ဆေးရုံမရောက်ခင်မှာပဲ သေဆုံးသွားခဲ့ပါတယ်။
ရဲတပ်ဖွဲ့ဟာ အလောင်းတွေကို ဧပြီ ၂၁ ရက် စတင်တူးဖော်ခဲ့တာဖြစ်ကြောင်း မာလင်ဒီမြို့မှ စုံထောက် ချားလ်စ်ကမောင်းက ပြောခဲ့ပြီး အသေးစိတ် အချက်အလက်တွေ ကိုတော့ မပြောခဲ့ပါဘူး။
ဘုရားကျောင်းရဲ့ခေါင်းဆောင် ပေါလ် မက်ကင်ဇီ ရဲ့ နောက်လိုက် အနည်းဆုံး ၃၁ ဦး ပိုင်ဆိုင်တဲ့ တိမ်မြှုပ်သင်္ချိုင်းတွေ ရှိနေကြောင်း သတင်းအစအနတွေ ရခဲ့ပြီးနောက်မှာ မက်ကင်ဇီကို ဖမ်းဆီးထားပါတယ်။
ဒီသေဆုံးမှုတွေဟာ လူသားမျိုးနွယ်အပေါ် ကျူးလွန်တဲ့ ရာဇ၀တ်မှုဖြစ်ကြောင်း ဟာကီ အာဖရိက လူ့အခွင့်အရေးအဖွဲ့မှ မက်သယူး ရှီပယ်တာ က ပြောကြားခဲ့ပါတယ်။
ပြီးခဲ့တဲ့လက ယောက်ျားလေး ၂ ယောက်ကို အစာအငတ်ခံခိုင်းပြီး၊ နောက်မှ သားသမီးတွေကို အသက်ရှူကြပ် သေဆုံးအောင်လုပ်ဖို့ ကလေးတွေရဲ့ မိဘတွေကို တိုက်တွန်းမှုတို့ကြောင့် ရဲတွေဟာ မက်ကင်ဇီ ကို ဖမ်းဆီးခဲ့ပြီး နောက်ပိုင်းမှာတော့ ပြန်လွှတ်ပေးခဲ့ပါတယ်။
ဒီအမှုကို တရားရုံးမှာ စစ်ဆေးခံရချိန်မှာတော့ မက်ကင်ဇီ က ကောင်လေး ၂ ယောက် သေဆုံးရတဲ့ အဖြစ်အပျက်တွေကို သူမသိခဲ့ကြောင်းနဲ့ သူဟာ သူ့ရဲ့လုပ်ဖော်ကိုင်ဖက်ဟောင်း တချို့ဆီက ရန်လိုတဲ့ဝါဒဖြန့်မှုရဲ့ ပစ်မှတ်ဖြစ်နေတယ်လို့ ပြောဆိုကြောင်း The Standard သတင်းစာက ဖော်ပြခဲ့ပါတယ်။