ဖိလစ်ပိုင်နိုင်ငံ၊ မနီလာမြို့မြောက်ပိုင်း ရေတပ်အခြေစိုက်စခန်းမှာ ဧပြီ ၂၅ ရက်က အမေရိကန် တပ်ဖွဲ့ဝင်တွေနဲ့ ဖိလစ်ပိုင်စစ်သားတွေ နှစ်ပတ်လည် စစ်ရေးလေ့ကျင့်ခန်းရဲ့  တစိတ်တပိုင်း အနေနဲ့ လေကြောင်းရန်ကာကွယ်ရေး ဒုံးကျည်တွေ ပစ်လွှတ်လေ့ကျင့်ခဲ့ပါတယ်။

တောင်တရုတ်ပင်လယ်ထဲက တရုတ်နဲ့ ဖိလစ်ပိုင်ကြား ပိုင်နက်အငြင်းပွားနေတဲ့ စပရတ်လေကျွန်းစုတွေကနေ ရေမိုင် ၁၄၀ အကွာမှာရှိတဲ့ ရေတပ်အခြေစိုက်စခန်းမှာ ဝေဟင်ကာကွယ်ရေးကို မြှင့်တင်ဖို့ ရည်ရွယ်တဲ့ မြေပြင်မှ ဝေဟင်ပစ် ပက်ထရီရော့နဲ့ စတင်ဂါ ဒုံးကျည်စနစ်တွေကို ပစ်ခတ် လေ့ကျင့်ခဲ့တာပါ။

အမေရိကန် တပ်မတော် စစ်ဦးစီးချုပ် ဗိုလ်ချုပ်ကြီး ဘရိုင်ယန် ဂစ်ပ်ဆွန်က“ဒေသတွင်း မိတ်ဘက်တွေ၊ မဟာမိတ်တွေရဲ့ လိုလားချက်တွေနဲ့အညီ အရှိန်အဟုန်နဲ့ လျှောက်လှမ်းသွားဖို့ ကတိကဝတ်ပြုထားပြီး တပ်ဖွဲ့ဝင်တွေကို လိုအပ်သလို အဆင်သင့် ပံ့ပိုးပေးနိုင်ဖို့ ပြင်ဆင်ထားတယ်” လို့ ပြောပါတယ်။

အင်္ဂါနေ့ စစ်ရေးလေ့ကျင့်မှုဟာ ဖိလစ်ပိုင်နဲ့ အမေရိကန်ကြား သုံးပတ်နီးပါးကြာမယ့် နှစ်စဉ်ကျင်းပနေကျ စစ်ရေးလေ့ကျင့်မှုရဲ့ တစိတ်တပိုင်းဖြစ်ပြီး အခုနှစ် လေ့ကျင့်မှု ပမာဏက စစ်သား ၁၇,၀၀၀ ကျော် ပါဝင်ခဲ့လို့ အကြီးကျယ်ဆုံး ဖြစ်ခဲ့ပါတယ်။