A d v e r t i s e m e n t With Us

close

ကိုဗစ်-၁၉ တတိယလှိုင်းကူးစက်ခံ ထိုင်းနိုင်ငံတွင် ဗီဇပြောင်းဗိုင်းရပ်စ်မျိုးကွဲ ၅ ခုထိ ကူးစက်ခံထားရ

ကိုဗစ်-၁၉ ရောဂါကူးစက်ပျံ့နှံ့မှု တတိယလှိုင်းအနေနဲ့ ကူးစက်မှုတွေ မြင့်တက်နေတဲ့ ထိုင်းနိုင်ငံမှာ ဗီဇပြောင်းဗိုင်းရပ်စ်မျိုးကွဲ ၅ ခုထိ ကူးစက်ခံထားရတယ်လို့ နေးရှင်းသတင်းတပုဒ်မှာ ဖော်ပြပါတယ်။

နိုင်ငံတွင်း ပထမဆုံး ကူးစက်မှုအနေနဲ့ ပြီးခဲ့တဲ့ ၂၀၂၀ ပြည့်နှစ်၊ ဇန်နဝါရီလမှာ စတင်ခဲ့ကာ တရုတ်နိုင်ငံ၊ ဝူဟန်မြို့က SARS-CoV-2 ဗိုင်းရပ်စ် စတင်ပျံ့နှံ့ခဲ့တာ ဖြစ်ပါတယ်။

အဲဒီနောက် ပြီးခဲ့တဲ့ ဧပြီလမှာတော့ ကူးစက်ပျံ့ပွားမှုနှုန်း ၁ ဒသမ ၇ ဆ ပိုပြင်းထန်တဲ့ ယူကေက မျိုးဗီဇပြောင်းဗိုင်းရပ်စ်ကူးစက်ပျံ့နှံ့မှုနဲ့အတူ တတိယလှိုင်းကူးစက်မှုတွေ ဖြစ်လာခဲ့တာပါ။

မေ ၅ ရက်နေ့မှာတော့ ထိုင်းနိုင်ငံ ကွာရန်တင်းစင်တာတခုကနေ ဘရာဇီးဗီဇပြောင်း ဗိုင်းရပ်စ်သစ်တမျိုး ထပ်မံကူးစက်ခံထားရကြောင်း ကိုဗစ်-၁၉ ရောဂါအခြေအနေ စီမံကြီးကြပ်မှုစင်တာကနေ ထုတ်ပြန်ခဲ့ပါတယ်။

ပြီးခဲ့တဲ့ မေ ၂၁ ရက်မှာတော့ ဘန်ကောက်ခရိုင်ထဲက ဆောက်လုပ်ရေးလုပ်ငန်းခွင်ထဲမှာ အိန္ဒိယဗီဇပြောင်းဗိုင်းရပ်စ်သစ် ကူးစက်ခံထားရတယ်လို့ ကျန်းမာရေးဆိုင်ရာ တာဝန်ရှိသူတွေက အတည်ပြုခဲ့ကြပါတယ်။

အဲဒီနောက် မေ ၂၂ ရက်နေ့မှာတော့ နရတ်သီဝပ်ထ်ခရိုင်ထဲမှာ တောင်အာဖရိက ဗီဇပြောင်း ဗိုင်းရပ်စ်သစ် ကူးစက်ခံထားရတဲ့ လူနာတွေ တွေ့ရှိရကြောင်း အတည်ပြုနိုင်ခဲ့တာပါ။

လက်ရှိမှာတော့ ထိုင်းနိုင်ငံတဝန်း ကိုဗစ်-၁၉ ရောဂါကူးစက်ခံထားရသူ စုစုပေါင်း ၁၃၅,၀၀၀ ကျော်ရှိလာခဲ့ပြီဖြစ်ကာ သေဆုံးသူပေါင်း ၈၃၂ ယောက် ရှိနေတာ ဖြစ်ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
Up