ဧရာဝတီတိုင်း၊ ဟင်္သာတမြို့နယ်မှာ မေလ ၂၇ ရက်နေ့က ခရိုင်တရားရုံးမှာ အမှုလိုက်ဖို့သွားတဲ့ တရားလွှတ်တော်ရှေ့နေ ဒေါ်ဧရာလင်းထွဋ်ကို စစ်ကောင်စီတပ်တွေက ဖမ်းဆီးခဲ့တယ်လို့ သိရပါတယ်။

ဟင်္သာတခရိုင်တရားရုံးမှာ နိုင်ငံရေးအကျဥ်းသားတွေရဲ့အမှုကို ဥပဒေအကျိုးဆောင်အဖြစ် လိုက်ပါဆောင်ရွက်ပေးနေချိန် ညနေပိုင်းမှာ ဖမ်းဆီးခံခဲ့ရတာလို့ သူ့ရဲ့မိတ်ဆွေတဦးက ပြောပါတယ်။

"အမှုလိုက်နေတုန်းကို ဖမ်းခေါ်သွားတာ။ ဒီနေ့ညနေပိုင်းမှာ ရီမန်ယူပြီး အခုတော့ ဟင်္သာတထောင်ကို ခေါ်သွားပြီး ထောင်ထဲမှာပဲ ချုပ်ထားတယ်" လို့ ပြောပါတယ်။

ဖမ်းဆီးခံရတဲ့ တရားလွှတ်တော်ရှေ့နေ ဒေါ်ဧရာလင်းထွဋ်ဟာ CDM ပြုလုပ်မှုကြောင့် ဖမ်းဆီးခံရတဲ့ မယ်ဇလီကုန်းမြို့ဆေးရုံအုပ် ဒေါက်တာ ပြည့်ဖြိုးနိုင်အပါအဝင် ဟင်္သာတခရိုင်အတွင်းရှိ ကြံခင်း၊ မြန်အောင်၊ အင်္ဂပူ၊ ဇလွန်နဲ့ ဟင်္သာတမြို့နယ်အတွင်းမှ နိုင်ငံရေးအမှုနဲ့ တရားစွဲဆိုခံရသူတွေအမှုကို လိုက်ပါဆောင်ရွက်ပေးနေသူလည်းဖြစ်ပါတယ်။

အကြမ်းဖက်စစ်ကောင်စီတပ်တွေက သူမကို ဖမ်းဆီးသွားပြီး ဟင်္သာတမြို့ရဲစခန်းမှာ ပ/၁၄၉၊ နိုင်ငံတော် ဆူပူအောင်လှုံ့ဆော်မှု ပုဒ်မ ၅ဝ၅ (က) နဲ့ အမှုဖွင့်ထားပြီး လာမယ့် ဇွန်လ ၁ဝ ရက်နေ့ ထပ်မံရုံးထုတ်မယ်လို့ သိရပါတယ်။