ဇွန်လ ၁၉ ရက် ဒီနေ့ကျရောက်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ မွေးနေ့အထိမ်းအမှတ်  ဂျပန်နိုင်ငံ၊ တိုကျိုမြို့ရှိ ကုလသမဂ္ဂရုံးရှေ့မှာ ဂျပန်ရောက်  မြန်မာနိုင်ငံသား ၅၀၀ ကျော်လောက်က  မေတ္တာပို့ဆုတောင်းပေးခဲ့ကြပါတယ်။

ဒါ့အပြင် မြန်မာနိုင်ငံမှာ အကြမ်းဖက်စစ်တပ်က အမျိုးသမီးနဲ့ ကလေးတွေအပေါ် လိင်အကြမ်းဖက်မှုကျူးလွန်တာနဲ့ ၊ ညှဉ်းပန်းနှိပ်စက်တာတွေကို ရပ်တန့်ရေးအတွက်လည်း ဒီနေက့မနက် တိုကျိုမှာ  ချီတက်လမ်းလျှောက်ဆန္ဒပြခဲ့ကြပါတယ်။ 

NGUအစိုးရမျိုးသမီး၊လူငယ်နှင့်ကလေးသူငယ်ရေးရာဝန်ကြီးရုံး (လူငယ်ရေးရာဝန်ကြီးဌာန) တို့ရဲ့လမ်းညွှန်မှုနဲ့ ဂျပန်၊ ကိုရီယားနဲ့ ထိုင်းအပါအဝင် ၅ နိုင်ငံ ကန်ပိန်းအဖြစ် နိုင်ငံတကာက ပိုမိုသိရှိလာစေဖို့ ပြုလုပ်တာလို့ ဦးဆောင်သူတဦးဖြစ်တဲ့ မသီရိသစ္စာက ပြောပါတယ်။

ဂျပန်ရောက် တိုင်းရင်းသူတစ်ဦးဖြစ်တဲ့ မိရတနာထွန်းကလည်း “မြန်မာစစ်တပ်က တိုင်းရင်းသားဒေသတွေမှာ အရင်ဆယ်စုနှစ်များစွာကတည်းက  မုဒိမ်းကျင့်သတ်ဖြတ်ခဲ့တာပါ။ အခုမင်းအောင်လှိုင်စစ်တပ် လက်ထက်မှာ ရန်ကုန်အပါအဝင်နယ်တွေမှာပါ တွေ့ကြုံနေရပါပြီ။ ဒါကြောင့် ကျမတို့ တိုင်းရင်းသား လူမျိုးမရွေးအားလုံး စုစည်းပြီး စစ်အာဏာရှင်ကိုအမြစ်ဖြုတ်ဖို့ အခုလိုပူးပေါင်းပါဝင်တာ” လို့ပြောပါတယ်။

သတင်း၊ ဓာတ်ပုံ - ဇော်ဇော်လှိုင်