ကရင်ပြည်နယ်၊ မြဝတီမြို့မှာ  ကိုဗစ်-၁၉ ရောဂါ ကူးစက်ခံရသူတွေ ဇွန်လ ၂၈ ရက်မှ ဇူလိုင်လ ၆ ရက်အထိ တစ်ပတ်အတွင်း နေ့စဉ်လိုလို သေဆုံးနေပါတယ်။

ကိုဗစ်ကူးစက်မှုကြောင့် သေဆုံးသူတွေဟာ အသက် ၅၀ နှစ်နဲ့ အထက် သက်ကြီးသူတွေ အများစုဖြစ်ပြီး အသက်ရှူလမ်းကြောင်းကနေ  ဗိုင်းရပ်စ်ကူးစက်ခံရလို့ သေဆုံးကြတာဖြစ်ပါတယ်။

မြဝတီမြို့မှာ ကိုဗစ်-၁၉ ရောဂါ ကူးစက်ခံရတဲ့  အတည်ပြုလူနာ  တစ်ရက်ကို  အယောက် ၁၀၀ အထက်ရှိနေပါတယ်။

ကိုဗစ်ကူးစက်ခံရတဲ့ လူနာတွေကို  မြဝတီမြို့ အမှတ်(၄)ရပ်ကွက်၊ ကျောက်လုံးကြီး ကြိုဆိုရေးစခန်းနဲ့  မဲကနယ်မြို့သစ်မှာ ထားရှိပါတယ်။ လူနာထားရှိတဲ့ စခန်းမှာ ကိုဗစ်ကူးစက်ခံရသူကို ပိုးစစ်ဆေးစရိတ်နှစ်ကြိမ်ကို ကျပ် ၂၀၀၀၀ နဲ့  တစ်ရက်စာ စရိတ် ကျပ် ၃၅၀၀ ၊  ၁၀ ရက်စာ ကုန်ကျစရိတ် ကျပ် ၅၅၀၀၀ ပေးဆောင်ရမှာပါ။ 

ဒါကြောင့် တချို့အလုပ်လက်မဲ့ ပြည်သူတွေအနေနဲ့ ရောဂါ ကူးစက်ခံရရင် ငွေကြေးကုန်ကျစရိတ် ပေးနိုင်ဖို့ အခက်ခဲများစွာကြုံတွေ့နေရတယ်လို့  မြဝတီမြို့ဒေသခံက ပြောပါတယ်။

မြဝတီမှာ  ကိုဗစ်ကူးစက်မှုမြင့်တက်နေတာကြောင့်  မြန်မာ-ထိုင်း နယ်စပ်ကုန်သွယ်မှုမှာလည်း အခက်ခဲရှိနေပြီး မြဝတီမြို့တွင်းမှာ ထိုင်းစားသုံးကုန်တွေနဲ့ အိမ်သုံးပစ္စည်းတွေလည်း စျေးမြင့်တက်နေပါတယ်။

မြဝတီတဘက်ကမ်း  ထိုင်းနိုင်ငံ၊ တာခ်ရိုင်၊ မဲဆောက်မြို့မှာလည်း ကိုဗစ်ကူးစက်ခံရသူ ပိုများလာတဲ့အတွက် ဆေးရုံနဲ့ ကွင်းဆေးရုံတွေကို တိုးချဲ့လုပ်ဆောင်နေပါတယ်။