ဧရာဝတီတိုင်းမြို့တော်ရှိ ပုသိမ်ဆေးရုံကြီးမှာ ကိုဗစ်-၁၉ လူနာတွေအတွက် ကုသရေးအထောက်အကူပစ္စည်းတွေ လိုအပ်ချက်ရှိနေပြီး  အောက်ဆီဂျင်ပါ မလုံလောက်ဖြစ်နေတာကြောင့် လူနာတွေ နေ့စဉ်သေဆုံးနေတယ်လို့ လူမှုကူညီရေးအဖွဲ့တွေထံက သိရပါတယ်။

“အောက်ဆီဂျင်အိုးလိုက်ငှားတာ  ငှားမရဘူး၊ ကုန်နေတာများတယ်။ အကုန်လုံးက လိုနေတော့ အောက်ဆီဂျင်မလုံလောက်တော့ဘူး။ ဒီအတိုင်းဆိုမလွယ်ဘူး ဒီနေ့လည်း တစ်ယောက်သေသွားတယ်။ လုံးဝမနိုင်တော့ဘူး”လို့ လူမှုရေးအသင်းအဖွဲ့ဝင်တစ်ဦးကပြောပါတယ်။

ပုသိမ်မြို့မှာ ဇူလိုင် ၅ ရက်​အထိ အတည်ပြုလူနာ ၅၀၀ ကျော်ထိရှိနေပြီး အနံ့ပျောက်သူတချို့က ကိုဗစ်-၁၉ ရောဂါပိုး ရှိမရှိစစ်​ဆေး​ပေးဖို့ ဆေးရုံတွေကို သွားရောက်တာမှာလည်း စစ်ဆေးပေးခြင်းမရှိဘူးလို့ ပုသိမ်မြို့​ခံတွေက ပြောပါတယ်။

“ကျနော့်အိမ်ကဖြစ်တာ၊ နေမကောင်းချင်ဘူး၊ အနံ့ သိပ်မရလို့ စစ်ပေးပါပြောတာကို စစ်မပေးဘူး။ Positive သမားနဲ့ ထိစပ်တဲ့သူကိုပဲ စစ်ဆေးတယ်လို့ သူတို့ကပြောတယ်။ ဘာမှမလုပ်တတ်ဘဲ အာဏာလုထားတဲ့ကောင်တွေ မလုပ်တတ်လည်း  ဆင်းပေးလိုက်တာမဟုတ်ဘူး”လို့ ပုသိမ်မြို့​နေထိုင်သူတစ်ဦးက ပြောပါတယ်။

ပုသိမ်မြို့မှာ ကိုဗစ်လူနာတွေကို ထားရှိဖို့နေရာ မလုံလောက်တော့ဘဲ နေအိမ်တွေကို ပြန်လွှတ်နေပြီး နေ့စဉ်လူသေဆုံးမှုတွေလည်း ရှိနေပါတယ်။

ပုသိမ်မြို့မှာ  ဇူလိုင် ၆ ရက်​က  ကိုဗစ်-၁၉ အတည်ပြုလူနာတွေ တစ်ဦး ​သေဆုံးပြီး အခုဆိုရင်  ​သေဆုံးသူ  ၁၄ ဦး အထိ ရှိလာပြီဖြစ်ပါတယ်။