မကွေးတိုင်း၊ တောင်တွင်းကြီးမြို့မှာ ဇူလိုင် ၈ ရက်က မြို့နယ်အုပ်ချုပ်ရေးမှူးအပါအဝင် ကိုဗစ်-၁၉ အတည်ပြုလူနာ ၁၈ ဦး တွေ့ရှိခဲ့တယ်လို့ မြို့နယ်ကျန်းမာရေးဦးစီးဌာနက သိရပါတယ်။

စစ်ဆေးတွေ့ရှိတဲ့ အတည်ပြုလူနာ ၁၈ ဦးထဲမှာ မြို့နယ်အုပ်ချုပ်ရေးမှူး ဦးစည်သူရှိန်းနဲ့ ကျန်အတည်ပြုလူနာတွေကတော့ တောင်တွင်းကြီးမြို့နယ်အတွင်း ကျေးရွာတွေကဖြစ်ပါတယ်။

မြို့နယ်အုပ်ချုပ်ရေးမှူးနဲ့ ထိစပ်သူတွေကို ထပ်မံစစ်ဆေးခဲ့ရာမှာတော့ ပိုးမတွေ့ရှိခဲ့ရဘူးလို့ မြို့နယ်ထွေအုပ်ရုံးက သိရပါတယ်။

တောင်တွင်းကြီးမြို့နယ် အုပ်ချုပ်ရေးမှူး ဦးစည်သူရှိန်းဟာ မကွေးမြို့မှာ ဇူလိုင် ၅ ရက်နေ့က စစ်ကောင်စီက ပြုလုပ်တဲ့ မကွေးတိုင်းစီမံအုပ်ချုပ်ရေး တိုင်းအဆင့် ကို ဗစ်ကာကွယ်ထိန်းချုပ်ရေးအစည်းအဝေးတက်ရောက်ခဲ့တယ်လို့ ဆိုပါတယ်။

မကွေးမြို့မှာ ဇူလိုင် ၇ ရက်နေ့က တိုင်းလျှပ်စစ်ဝန်ထမ်းနဲ့ မိသားစု ၄ ဦး၊ တိုင်းစာရင်းရုံးဝန်ထမ်း ၁ ဦး၊ မကွေးစီးပွားရေးဘဏ်ဝန်ထမ်း ၁၂ ဦး၊ စစ်ကောင်စီအစိုးရဝန်ထမ်းနဲ့ မိသားစုအယောက် ၆၀ အပါအဝင် ၁၁၇ ဦး စံချိန်တင် ကိုဗစ်-၁၉ ရောဂါပိုး ကူးစက်ခံခဲ့ရတယ်လို့ တိုင်းကျန်းမာရေးဌာနရဲ့ စာရင်းတွေအရ သိရပါတယ်။

တောင်တွင်းကြီးမှာ ကိုဗစ်-၁၉ တတိယလှိုင်းကာလမှာ ဒီနေ့အထိ ကိုဗစ်-၁၉ အတည်ပြုလူနာ ၁၃၃ ဦးနဲ့ သေဆုံးသူ ၁ ဦးရှိတယ်လို့ စစ်ကောင်စီ ကျန်းမာရေးဌာန ထုတ်ပြန်ချက်အရ သိရပါတယ်။

လူမှုကူညီရေးအသင်းအဖွဲ့တွေရဲ့ စာရင်းတွေအရတော့ တောင်တွင်းကြီးမှာ ကိုဗစ်-၁၉ ကြောင့် ဆရာတော် ၁ ပါးအပါအဝင် သေဆုံးသူ စုစုပေါင်း ၅ ဦးရှိပြီလို့ သိရပါတယ်။