ထိုင်းနိုင်ငံမြောက်ပိုင်း ချင်းမိုင်ခရိုင်ထဲမှာ ကိုဗစ်-၁၉ တတိယလှိုင်းကူးစက်မှုမြင့်လာတဲ့အတွက် မြို့နယ်တချို့က စာသင်ကျောင်းတွေ ယာယီပိတ်ထားဖို့ ခရိုင်ကိုဗစ်-၁၉ ကာကွယ်ရေး နဲ့ စီမံခန့်ခွဲရေးဌာနက ကြေညာပါတယ်။

အထူးသဖြင့် ချင်းမိုင်မြို့ပေါ်နဲ့ ဆန်ဆိုင်း၊ ဆန်ကမ်ဖိုင်း၊ ဟန်ဒုံး၊ ဆာရဖီး၊ မဲ့လိမ်း၊ ဒွိုင်စကစ် စတဲ့ မြို့နယ်က အခြေခံပညာကျောင်းတွေကို ဇူလိုင် ၈ ရက်မှ ၃၁ ရက်နေ့ထိ ယာယီပိတ်ထားဖို့  ညွှန်ကြားထားပါတယ်။

ကျောင်းအိပ်ကျောင်းစား ဘော်ဒါဆောင်တွေအနေနဲ့တော့ ပိတ်စရာမလိုပေမယ့် ကိုဗစ်-၁၉ ကာကွယ်ရေး စည်းကမ်းချက်တွေကို တင်းတင်းကျပ်ကျပ်လိုက်နာဖို့ လိုအပ်တယ်လို့ ဆိုပါတယ်။ တခြားမြို့နယ်က စာသင်ကျောင်းတွေလည်း ကိုဗစ်-၁၉ ကူးစက်မှုအခြေအနေအလိုက် ပိတ်ထားနိုင်တယ်လို့ ဆိုပါတယ်။

ပြီးခဲ့တဲ့ရက်ပိုင်းက မယ့်လိမ်းမြို့နယ်တွင်းရှိ အလယ်တန်းကျောင်းတကျောင်းမှာ ဘန်ကောက်ကပြန်လာတဲ့ မိဘကနေတဆင့် ကလေးကို  ကိုဗစ်-၁၉ ကူးစက်ပြီး ကလေးက မသိဘဲ ကျောင်းတက်နေတာကြောင့် အခန်းဖော်တချို့ပါ ကူးစက်ခဲ့ပါတယ်။

ချင်းမိုင်မှာ ပြီးခဲ့တဲ့လက ကိုဗစ်-၁၉ ကူးစက်သူ လျော့နည်းသွားလို့ ယာယီဆေးရုံတွေ ပိတ်သိမ်းခဲ့ပြီး ဒီဇူလိုင်လထဲမှာ တခါပြန်မြင့်လာတာပါ။  ဒီကနေ့ ထုတ်ပြန်ချက်အရ နောက်ထပ်ပိုးတွေ့လူနာ ၃၁ ဦးရှိပြီး ချင်းမိုင်ခရိုင်မှာ ပိုးကူးစက်ခံရသူစုစုပေါင်း ၄၂၉၅ ဦးရှိ သွား ပြီဖြစ်ပါတယ်။

မြန်မာရွှေ့ပြောင်းလုပ်သားအများစုနေထိုင်ရာ စမွတ်စခွန်းခရိုင် မဟာချိုင်မှာလည်း ကိုဗစ်-၁၉ ကူးစက်မှုမြင့်မားတာကြောင့် ရွှေ့ပြောင်းလုပ်သားကလေးတွေအတွက် ဖွင့်ထားတဲ့ ကျောင်းလည်း ပိတ်ထားရတာ ၁ နှစ်ကျော်ပြီလို့ MCDC ( Migrant Children Development Center )  ကျောင်းက တာဝန်ခံ ဆရာ ဦးစောလရောင်စိုးက ဒီဗွီဘီကို ပြောပါတယ်။ 

       “ကျနော်တို့ကျောင်းက စာမသင်ရတာ မနှစ်ကတည်းက ၊ ကျောင်းသားဦးရေကများပြီး အခန်းကကျဉ်းတော့ ထိုင်းကျောင်းတွေလို Social distancing မလုပ်နိုင်ဘူး။ အဲတော့ ထိုင်းကျောင်းတွေက ကိုဗစ်-၁၉ စည်းကမ်းချက်နဲ့အညီ ဖွင့်နေတုန်းကတောင် ကျနော်တို့ မဖွင့်နိုင်ခဲ့ဘူး၊ ကိုဗစ်-၁၉ ပထမလှိုင်း ၊ ဒုတိယလှိုင်းပါးသွားတဲ့အချိန် ပြန်ဖွင့်ဖို့ကြိုးစားခဲ့ပါသေးတယ်။ ဒါပေမဲ့ ကျနော်တို့က မြန်မာပြည်က ပညာရေးစနစ်အတိုင်းပဲ သင်တယ်ဆိုတော့ မြန်မာပြည်မှာ ကျောင်းတွေပိတ်လိုက်ချိန်နဲ့ကြုံတော့ ကျောင်းဖွင့်ဖို့ရာ အဆင်မပြေပြန်ဘူး၊ အခုကျနော်တို့ စာသင်ခန်းက ယာယီဆေးရုံဖြစ်လိုက် ကွာရန်တင်းစင်တာဖြစ်လိုက်နဲ့ပေါ့”။

အခုလို ကျောင်းပိတ်ထားတော့ ကလေးတွေ ပညာကောင်းစွာမသင်နိုင်သလို ဆရာ ဆရာမတွေလည်း အလုပ်လက်မဲ့ ဝင်ငွေမဲ့နေကြောင်း ၊ ရွှေ့ပြောင်းလုပ်သားအနေနဲ့ ရရာအလုပ်ဝင်လုပ်တော့လည်း ပြည်ဝင်ခွင့်ဗီဇာမှာ ရွှေ့ပြောင်းလုပ်သားအဖြစ်ပြန်ပြောင်းဖို့ ခက်ခဲနေသလို တချို့ဆရာ/ဆရာမတွေ ပြည်တွင်းပြန်ဝင်သွားပြီး ပြန်လာဖို့လည်းခက်ခဲနေပြန်တယ်လို့ ဆိုပါတယ်။

မဟာချိုင် MCDC ကျောင်းမှာ ကျောင်းသားပေါင်း ၅၀၀ ကျော်ရှိပြီး ဆရာဆရာမ ၁၇ ဦးရှိပါတယ်။ မဟာချိုင်မှာ ရွှေ့ပြောင်းလုပ်သားကလေးတွေအတွက်ဖွင့်ထားတဲ့ စာသင်ကျောင်း သုံး လေး ကျောင်းရှိပြီး အဆိုပါကျောင်းတွေလည်း ကိုဗစ်-၁၉ ကြောင့် အနည်းနဲ့အများ ထိခိုက်မှုရှိနေပါတယ်။ 

အလားတူ မြန်မာအများစုနေထိုင်ရာ တာ့ခ်ခရိုင် မဲဆောက်မြို့နယ်မှာလည်း ကိုဗစ်-၁၉ ပထမလှိုင်းကတည်းက ရွှေ့ပြောင်းလုပ်သား စာသင်ကျောင်းတွေပိတ်ထားရပြီး အွန်လိုင်းစနစ်နဲ့ သင်ကြားပေမယ့် လူတိုင်းကွန်ပြူတာလက်တော့ပ်တွေ မသုံးနိုင်ဘူးလို့  ထိုင်းနိုင်ငံရောက်မြန်မာပြည်သားများအရေးပူးတွဲလှုပ်ရှားမှုကော်မတီဥက္ကဋ္ဌ ဦးမိုးကြိုးက ဒီဗွီဘီကို ပြောပါတယ်။

“ကျနော်တို့ ပြီးခဲ့တဲ့ ၂၀၂၀ မတ်လ ၁၈ ရက်နေ့ကစပြီး ထိုင်းနိုင်ငံမှာ ကိုဗစ်-၁၉ ပထမလှိုင်းစဖြစ်တယ်၊ အဲဒီကတည်းက မဲဆောက်အပါအဝင် တာ့ခ်ခရိုင် ၅ မြို့နယ်မှာ ဖွင့်လှစ်ထားတဲ့ မြန်မာရွှေ့ပြောင်းအလုပ်သမားစာသင်ကျောင်းတွေ ထိုင်းအစိုးရ အသိအမှတ်ပြုထားတာ ကျောင်းပေါင်း ၇၀ ရှိတယ်။ အဲဒါတွေ အကုန်ပိတ်ထားရတယ်။ ဒီဇွန်လ ၂၈ ရက်နေ့မှာ ဖွင့်ခွင့်ရမယ်လို့ ဖြစ်ပြီးကာမှ မဲဆောက်မှာ ဇွန်လ ၂၅ ရက်နေ့ကစပြီး ကိုဗစ်-၁၉ တတိယလှိုင်း ပြန်လာတော့ ပြန်ပိတ်သွားတာပေါ့။ မဖွင့်ဖြစ်ဘူးပေါ့ ၊ ဒီကြားထဲမှာ အွန်လိုင်းစနစ်နဲ့ သင်တာတော့ရှိတယ်။ ဒါပေမဲ့ အလုပ်သမားသားသမီးအများစုက ဆင်းရဲနွမ်းပါးတော့ ကွန်ပြူတာတွေ လက်တော့ပ်တွေ အင်တာနက်တွေ မသုံးနိုင်တော့ အခက်အခဲရှိပြန်တယ်၊  ကျောင်းသားအင်အားရဲ့ ၄ ချိုး ၁ ချိုးလောက်ပဲသင်လို့ရတာပေါ့”။

ထိုင်းနိုင်ငံ ကိုဗစ်-၁၉ ကူးစက်မှု ဒီကနေ့အခြေအနေမှာ နောက်ထပ် ကူးစက်ခံရသူ ၉၂၇၆ ဦးရှိပြီး သေဆုံးသူ ၇၂ ဦးရှိပါတယ်။ အခုဆိုရင် ထိုင်းတနိုင်ငံလုံးမှာ ကိုဗစ်-၁၉ ကူးစက်ခံရသူစုစုပေါင်း ၂၈၈၆၄၃ ဦးရှိပြီး ၂၁၂၆၅၁ ဦး သက်သာပျောက်ကင်းကာ ၂၅၃၄ ဦး သေဆုံးခဲ့ပါတယ်။