ကယားပြည်နယ်၊ လွိုင်ကော်မြို့မှာ ဇူလိုင် ၉ ရက်နေ့တရက်တည်း  ကိုဗစ်-၁၉ အတည်ပြုလူနာ ၁၉ ဦး ထပ်တိုးလာပြီး  လက်ရှိလွိုင်ကော်ဆေးရုံမှာ အတည်ပြုလူနာ ၄၅  ဦး ဆေးကုသ မှုခံယူနေတယ်လို့  လွိုင်ကော် ပြည်သူ့ဆေးရုံက သိရပါတယ်။

လွိုင်ကော်ဆေးရုံကြီးမှာ အထွေထွေဆေးရုံတက်လူနာ ၉၆ ဦး၊  ကျောက်ကပ်ဆေးသန့်စင်လူနာ ၁၆ ဦး၊ ပြင်ပလူနာ ၂၆ ဦး၊ ကိုဗစ်-၁၉ ပိုးတွေ့လူနာ ၄၅ ဦးရှိနေတယ်လို့ ဆေးရုံက  ထုတ်ပြန်ပါတယ်။

ပြည်နယ်ဆေးရုံဝန်ထမ်း အင်အားနည်းနေတဲ့အတွက် ကျန်းမာရေးဝန်ထမ်းတွေရဲ့ ကုသရေး စီမံခန့်ခွဲဆောင်ရွက်မှုလိုအပ်ချက်ကို နားလည်ပေးကြဖို့နဲ့  ဆေးရုံစည်းကမ်းကို ဝိုင်းဝန်းလိုက်နာကြဖို့လည်း လွိုင်ကော်ဆေးရုံ လူမှုကွန်ယက်စာ မျက်နှာမှာ  မေတ္တာရပ်ခံထား ပါတယ်။

ဒါ့အပြင် ဇူလိုင် ၈ ရက်က  ပိုးတွေ့ရှိခဲ့တဲ့လူနာ ၁၅ ဦးထဲက အသက် ၇၀ အရွယ်အမျိုးသမီးတဦးလည်း  မနေ့မနက်ပိုင်းမှာ သေဆုံးသွားတယ်လို့ ရွှေလွိုင်ကော် ပရဟိတအသင်းက ဆိုပါတယ်။

လွိုင်ကော်မှာ  ပြီးခဲ့တဲ့ ဇူလိုင် ၆ ရက်နေ့ ညမှာ အမျိုးသားတစ်ဦး ကိုဗစ်-၁၉ ရောဂါနဲ့  သေဆုံးခဲ့ပြီး အခု သေဆုံးသူမှာ  ဒုတိယမြောက် ဖြစ်ပါတယ်။

လွိုင်ကော်မြို့မှာ ဇူလိုင် ၈ ရက်နေ့ တရက်တည်း ကိုဗစ်-၁၉ အတည်ပြုလူနာ ၁၄ ဦးတွေ့ရှိခဲ့ပြီး ဇူလိုင် ၉ ရက်နေ့မှာတော့ ၁၅ ဦး တွေ့ရှိတာဖြစ်ပါတယ်။ ပိုးတွေ့လူနာတွေ အထဲမှာ တောင်ဈေးမှာ အသားငါးရောင်းတဲ့ ဈေးသည် အပါအဝင် ကုန်စုံဆိုင်က ဝန်ထမ်းတွေလည်းပါဝင်နေပါတယ်။

ဒါဟာ ပြည်နယ်အတွင်းကူးစက်မှုများပြားလာတဲ့အနေအထားမှာရှိနေတာဖြစ်ပြီး လတ်တလော စစ်အာဏာသိမ်းမှုကြောင့် ကယားပြည်နယ်မှာ ကျန်းမာရေးဝန်ထမ်းတွေအပါအဝင် တခြားဝန်ထမ်းတွေလည်း CDM ဝင်တဲ့အတွက် ရောဂါ ထိန်းချုပ်နိုင်ရေး စိုးရိမ်စရာဖြစ် နေပါတယ်။