ကချင်ပြည်နယ် ဝိုင်းမော်မြို့နယ်မှာ ဇူလိုင် ၁၃ ရက်နေ့မနက်က ကိုဗစ်လူနာအမျိုးသမီးတစ်ဦး ထပ်မံသေဆုံးပြီး ပိုးတွေ့အတည်ပြုလူနာ ၁၀၀ ကျော်အထိ ရှိလာခဲ့ပြီလို့ မြို့နယ်ကုသရေးဦးစီးဌာနကနေ သိရပါတယ်။

သေဆုံးသွားသူဟာ ခတ်ချိုကျေးရွာအထက်ပိုင်းက အသက် ၅၉ နှစ်အရွယ် အမျိုးသမီးကြီးဖြစ်ပြီး သွေးတိုးရောဂါအခံရှိကာ ပိုးတွေ့ရှိခဲ့ပြီးနောက် ဇူလိုင် ၇ ရက်နေ့ကတည်းက မြို့နယ်ဆေးရုံမှာ တက်ရောက်ကုသပေးခဲ့တာဖြစ်ပါတယ်။ 

ဆေးရုံတက်နေစဉ်မှာလည်း ကိုဗစ်ကြောင့် ဖျားနာ၊ ချောင်းဆိုး၊ မောပန်းတာတွေရှိခဲ့ပြီး တောက်လျှောက်အောက်ဆီဂျင်ပေးကုသနေစဉ်မှာ အမောဖောက်သေဆုံးသွားခဲ့တာလို့ ဆိုပါတယ်။

ဇူလိုင် ၁၂ ရက်ည ထုတ်ပြန်ချက်အထိ ဝိုင်းမော်မြို့နယ်မှာ ကိုဗစ်တတိယလှိုင်းအတွင်း ပိုးတွေ့အတည်ပြုလူနာ ၁၁၃ ဦးနဲ့ သေဆုံးသူ ၂ ဦး ရှိနေပြီဖြစ်ပါတယ်။

အတည်ပြုလူနာအများဆုံး တွေ့ရှိခဲ့တဲ့ မခန်းတီးကျေးရွာကိုလည်း ဇူလိုင် ၈ ရက်နေ့ကတည်းက ကချင်ပြည်နယ် ပြည်သူ့ကျန်းမာရေးဦးစီးဌာနမှ အသွားအလာကန့်သတ် (လော့ဒေါင်း) ပြုလုပ်ထားခဲ့တယ်လို့ ဒေသခံတွေဆီက သိရပါတယ်။