ရန်ကုန်တိုင်း၊ လှိုင်မြို့နယ်၊ အမှတ် ၁ ရပ်ကွက်မှာ စက်တင်ဘာ ၂ ရက် ညနေပိုင်းက စစ်ကောင်စီကို သတင်းပေးနေတဲ့  ရာအိမ်မှူး အမျိုးသား ၁ ဦး သေနတ်နဲ့ပစ်သတ်ခံခဲ့ရတယ်လို့ သိရပါတယ်။

ရပ်ကွက်ထဲမှာ စစ်တပ်ကိုသတင်းပေးနေတဲ့ ရာအိမ်မှူး ဂျုလှိုင်(ခ) မင်းမင်းထွန်းကို ညနေ ၆ နာရီ မိနစ် ၂၀ လောက်မှာ သေနတ်နဲ့ ၄ ချက်လောက် ပစ်ခတ်ရှင်းလင်းခဲ့တယ်လို့ PDF တပ်ဖွဲ့ဝင်တဦးက ပြောပါတယ်။

"သူကြောင့်ကလေးတွေအဖမ်းခံရတာများပြီ ဆန္ဒပြထဲက သတင်းပေးနေတာ ခုထိ စစ်ကောင်စီအားကိုးနဲ့  အရှိန်ဝါပြနေတဲ့ ကောင်ပေါ့ အဲ့တာကြောင့် ရှင်းရတာပါ''လို့ ပြောပါတယ်။

အဆိုပါ ရာအိမ်မှူး သေနတ်နဲ့ပစ်ခတ်ခံရပြီး နောက်ပိုင်း မိနစ်ပိုင်းအတွင်း စစ်ကောင်စီတပ်တွေက ရပ်ကွက်ထဲက ရောက်လာပြီး လမ်းတွေကို ပိတ်ဆို့စစ်ဆေးကာ ည ၁၂ နာရီကျော်တဲ့ထိ ဧည့်စာရင်းစစ်ဆေးခဲ့ပေမဲ့ ဖမ်းဆီးခံရသူတော့မရှိဘူးလို့ ဒေသခံတွေက ပြောပါတယ်။

လှိုင်မြို့နယ်မှာ သြဂုတ် ၂၉ ရက်နေ့က စစ်ကောင်စီ အမာခံသတင်းပေးဖြစ်တဲ့ ဦးတင်လှိုင်ကိုလည်း PDF ဘက်က သေနတ်နဲ့ ၅ ချက်ပစ်ခတ်  ရှင်းလင်းခဲ့တယ်လို့ သိရပါတယ်။