အမည်ခေါ်ဆိုအားပေးသည့် ပရိသတ်ကြောင့် ယုံကြည်မှုပိုရှိခဲ့ဟု ဆာကာပြော

အန်ဒိုရာနဲ့ ကမ္ဘာ့ဖလားခြေစစ်ပွဲစဉ်မှာ သူ့ရဲ့အမည်ကို ခေါ်ဆိုပြီး ပရိသတ်တွေကအားပေးခဲ့ကြ တဲ့အတွက် ယုံကြည်မှုပိုရှိလာပြီး ခြေစွမ်းပြကစားနိုင်ခဲ့တယ်လို့ အင်္ဂလန်ကစားသမားဆာကာ ကပြောပါတယ်။
ဆာကာဟာပြီးခဲ့တဲ့ ယူရိုဗိုလ်လုပွဲမှာ ပင်နယ်တီလွဲချော်ခဲ့ပြီးနောက် ဝေဖန်မှုတွေ အပြင် လူမျိုးရေးခွဲခြားမှုတွေပါ လုပ်ဆောင်ခံခဲ့ရတာပါ။
အဲဒီအတွက် အင်္ဂလန်ပရိသတ်တွေက အခုပွဲမှာ ဆာကာကို ပိုမိုအားပေးခဲ့ကြတာဖြစ်ပါတယ်။ ဆာကာဟာအန်ဒိုရာနဲ့ပွဲမှာ အနိုင်ဂိုး ၁ ဂိုးသွင်းယူနိုင်ခဲ့သလို ဂိုးဖန်တီးမှု ၂ ကြိမ်လောက် လုပ်ဆောင်နိုင်ခဲ့တာပါ။
ပွဲအပြီးမှာတော့ ပြီးပြည့်စုံတဲ့ အသက် ၂၀ ပြည့်မွေးနေ့ ဖြစ်ခဲ့ပြီး နိုင်ပွဲရယူနိုင်ခဲ့တဲ့အပေါ်ပျော်ရွှင်မိတယ်လို့ ဆာကာကပြောပါတယ်။ ဒါ့အပြင် ဘာကူယို ဆာကာ ဆိုတဲ့အမည်ကို ပရိသတ်တွေက သံပြိုင်အော်ဟစ် အားပေးခဲ့ကြပြီး အဲဒီလိုအားပေးပုံက ယုံကြည်မှုပိုကောင်းစေတယ်လို့ ဆာကာကပြောပါတယ်။
ရုပ်သံတင်ဆက်သူတွေဖြစ်ကြတဲ့ အီရန်ရိုက်နဲ့ ရွိုင်ကိန်းတို့ကတော့ ဆာကာဟာ လူမျိုးရေးခွဲခြားခံခဲ့ရမှုတွေကနေ ပြန်လည်ရုန်းထွက်နိုင်ခဲ့ပြီး ခြေစွမ်းပြ ကစားနိုင်ခဲ့တယ်လို့ ချီးကျူးခဲ့ကြပါတယ်။