ယူကရိန်းနိုင်ငံ Lviv မြို့အနီးမှာ စက်တင်ဘာ ၂၄ ရက်က နိုင်ငံ ၁၅ နိုင်ငံမှ နေတိုး တပ်ဖွဲ့ဝင်တွေဟာ တိုက်ရိုက်ပစ်ခတ်လေ့ကျင့်မှုမှာ ပါဝင်ခဲ့ကြပါတယ်။ 

ယူကရိန်းနဲ့ အမေရိကန်တို့ ဦးဆောင်တဲ့ စစ်ရေးလေ့ကျင့်မှုတွေကို နှစ်စဉ်ပြုလုပ်ခဲ့တာပါ။ ဒီနှစ်မှာတော့ ယူကရိန်းစစ်သည် ၄ ထောင်အပါအဝင် စစ်သား ၆ ထောင် ၀န်းကျင်လောက် ပါ၀င်ခဲ့ပါတယ်။ 

၂၀၁၄ ခုနှစ်မှစပြီး ရုရှားကျောထောက်နောက်ခံပေးထားတဲ့ ခွဲထွက်ရေးသူပုန်တွေနဲ့ စစ်တိုက်နေတဲ့ ယူကရိန်းဟာ တစ်နေ့နေ့မှာ နေတိုးနဲ့ ပူးပေါင်းနိုင်ဖို့မျှော်လင့်ချက်နဲ့ အနောက်နိုင်ငံ စစ်တပ်တွေနဲ့ ပိုပြီးနီးနီးကပ်ကပ် ပေါင်းစည်းမှုတွေ လုပ်နေတာပါ။

လတ်တလောသီတင်းပတ်တွေအတွင်းမှာ ရုရှားနဲ့ ဘီလာရုစ်တို့ရဲ့ နယ်စပ်အနားက နေတိုးနဲ့ အီးယူနယ်နိမိတ်အနီးမှာ မော်စကိုအစိုးရက ကြီးမှူးတဲ့ စစ်ရေးလေ့ကျင့်မှုကြီးကို လုပ်ဆောင်ထားပြီး အဲဒီမှာ တပ်ဖွဲ့ဝင် ၂ သိန်း ပါဝင်တယ်လို့ ရုရှားက ပြောထားပါတယ်။