စစ်ကိုင်းတိုင်း၊ မုံရွာမြို့ရှိ အမှတ် ၁ ရဲစခန်းနဲ့ အမှတ် ၂ ရဲစခန်းအတွင်းကို နိုဝင်ဘာ ၅ ရက် ဒီနေ့ ညနေပိုင်းက လက်ပစ်ဗုံးနဲ့ အပစ်ခံရတယ်လို့  ဒေသခံတွေထံက သိရပါတယ်။

ဒီညနေ ၄ နာရီလောက်မှာ  အမှတ် ၁ ရဲစခန်းမှာ တကြိမ်၊ ညနေ ၅ နာရီလောက်က အမှတ် ၂ ရဲစခန်းမှာ တကြိမ် လက်ပစ်ဗုံးနဲ့ အပစ်ခံရတာလို့  ရဲစခန်းနဲ့နီးစပ်သူများထံကနေသိရပေမဲ့ လူတွေ ထိခိုက်သေဆုံးမှု ရှိမရှိ အခြေအနေကိုတော့ မသိရပါဘူး။ 

အဲဒီဖောက်ခွဲမှုကို  PDF-South Monywa အဖွဲ့နဲ့ Monywa Heroes Group တို့ ပူးပေါင်းပြီး တိုက်ခိုက်ခဲ့တာလို့  PDF-South Monywa ပြန်ကြားရေးတာဝန်ရှိသူက ဒီဗွီဘီကိုပြောပါတယ်။ 

“အမှတ် ၂ ရဲစခန်းကိုတော့ လက်ပစ်ဗုံးအပြင် ရဲတစ်ယောက်ကိုလည်း သေနတ်နဲ့ ၂ ချက်ပစ်သတ်ခဲ့တယ်။ နောက်ပြီး မုံရွာအမှတ် ၁ ရဲစခန်းနဲ့ စစ်တပ်ထောက်ခံ အားပေးနေတဲ့ သံရည်ကြိုစက်ကိုလည်း ဗုံးတစ်လုံးစီနဲ့ ထုခဲ့တယ်။”

မုံရွာမြို့နယ်အတွင်း စစ်ကောင်စီက ပြည်သူတွေကို ဖမ်းဆီးစစ်ဆေးတာတွေ အပြင်းအထန်ပြုလုပ်နေတာကြောင့် မုံရွာမြို့ကို နယ်ကနေ ဈေးတက်လာဝယ်တဲ့ သူတွေလည်း ဖမ်းဆီးခံရတာရှိတယ်လို့ ဒေသခံတွေက ပြောပါတယ်။