အသင်းဟောင်း လီဗာပူးနဲ့ပွဲမှာလည်း အနိုင်ရဖို့ကြိုးပမ်းမယ်လို့ အက်စတွန်ဗီလာ နည်းပြ ဂျရတ်က ပြောပါတယ်။ 

ဂျရတ်ဟာ စကော့တလန် ကလပ် ရိန်းဂျားမှာ အောင်မြင်မှုတချို့ရယူနိုင်ခဲ့ပြီးနောက် အက်စတွန်ဗီလာနည်းပြအဖြစ် ခန့်အပ်ခံခဲ့ရပါတယ်။ 

ဗီလာအသင်းဟာ လာမယ့် ဒီဇင်ဘာ ၁၁ ရက်မှာ လီဗာပူးနဲ့ အမ်ဖီးလ်ကွင်းမှာ သွားရောက်ကစားရမှာ ဖြစ်ပါတယ်။

လီဗာပူးအသင်းရဲ့ ဂန္ထဝင်ကစားသမားတစ်ဦးဖြစ်ပေမယ့် ပြိုင်ဘက်နည်းပြအနေနဲ့ သွားရောက်ရင်ဆိုင်ရာမှာတော့ အနိုင်ရဖို့အတွက်ပဲ ကစားမှာဖြစ်ပြီး ပွဲတိုင်းကို အဲဒီလိုစိတ်ဓာတ်နဲ့ ကစားဖို့လိုအပ်တယ်လို့ ဂျရတ်က ပြောပါတယ်။ 

“အမ်ဖီးလ်ကွင်းမှာ သွားရောက်ကစားရမှာက အရေးပါတဲ့အခွင့်အရေးတစ်ခုဖြစ်ပြီး အနိုင်ရဖို့ ဒါမှာမဟုတ် အမှတ်ရနိုင်သမျှယူဖို့ပါပဲ။ ကျနော်က ပွဲတိုင်း နိုင်ချင်ပါတယ်။ ပထမဦးစားပေးတဲ့အရာက အသင်းအတွက် အစွမ်းကုန်အာရုံစိုက်ပြီး ပေးဆပ်ချင်ပါတယ်။ ပရိသတ်တွေကို အာမခံနိုင်တာတစ်ခုက ကစားသမားတွေနဲ့ အသင်းဝန်ထမ်းအားလုံးက တစ်ခုခုလုပ်ပြနိုင်ဖို့ ကတိပေးနိုင်တယ် ဆိုတာပါပဲ” လို့ ဂျရတ်က ပြောပါတယ်။ 

ဂျရတ်ဟာ သူ့ရဲ့ နည်းပြဘဝ ပထမဆုံး ပရီးမီးယားလိဂ်ပွဲစဉ်အနေနဲ့  စနေနေ့မှာ ဘရိုက်တန်နဲ့ ကစားသွားရမှာဖြစ်ပါတယ်။